சென்னை: 44ஆவது செஸ் ஒலிம்பியாட் போட்டி நாளை மாமல்லபுரத்தில் கோலாகலமாக தொடங்க உள்ளது. இதன் தொடக்க விழா நேரு உள்விளையாட்டரங்கில் நடைபெறுகிறது. இந்த நிகழ்வில் பிரதமர் மோடி கலந்து கொண்டு செஸ் ஒலிம்பியாட் போட்டியைத் தொடங்கி வைக்கிறார்.
சிறப்பு விருந்தினர்கள், பிரபலங்கள் கலந்துகொள்ளும் இந்த நிகழ்விற்காகவும், செஸ் ஒலிம்பியாட் குறித்து விழிப்புணர்வு ஏற்படுத்தும் வகையிலும் சென்னை முழுவதும் விளம்பரப்பதாகைகள் வைக்கப்பட்டுள்ளன. சென்னை - நேப்பியர் பாலத்தை செஸ் போர்டுபோல மாற்றியது முதல் ஆவின் பால் பாக்கெட்டில் செஸ் தம்பி உருவத்தை அச்சடித்து விநியோகம் செய்வது வரை அரசு சார்பில் ஒலிம்பியாட் குறித்து விழிப்புணர்வு நடவடிக்கைகள் எடுக்கப்பட்டுள்ளன.
இந்த நிலையில் விளம்பரப்பதாகைகளில் பிரதமரின் புகைப்படம் இல்லை என பாஜகவினர் குற்றஞ்சாட்டினர். இதனிடையே தமிழ்நாடு பாஜகவில் முக்கியப்பொறுப்பு வகிக்கும் அமர் பிரசாத் ரெட்டி, சென்னை மாநகரப் பேருந்து நிறுத்தங்களில் வைக்கப்பட்டுள்ள விளம்பரப்பதாகைகளில் பிரதமரின் படத்தினை ஒட்டி, ஆளும் திமுக அரசு பிரதமரின் படத்தை விளம்பரப்பதாகைகளில் வைக்காமல் விட்டுத் தவறு செய்ததால் தாங்கள் அப்படத்தினை ஒட்டுவதாக வீடியோ வெளியிட்டார்.
மேலும் தமிழ்நாடு முழுவதும் அரசு வைத்துள்ள செஸ் ஒலிம்பியாட் விளம்பரப் பதாகைகள், விழிப்புணர்வு போஸ்டர்களில் பிரதமரின் புகைப்படத்தை ஒட்ட வேண்டும் எனக் கட்சித்தொண்டர்களுக்கு அழைப்பு விடுத்துள்ளார்.
தற்போது பாஜகவின் இந்தச்செயலுக்கு எதிர்ப்பினைப்பதிவு செய்யும் விதமாக திராவிடர் கழகத்தினர் , பிரதமரின் புகைப்படத்தின் மீது கறுப்பு மை ஊற்றி அழித்து வருகின்றனர். அதுமட்டுமின்றி #GoBackModi ட்விட்டரில் டிரெண்ட் ஆகி வருகிறது. பாஜகவினர் வணக்கம் மோடி, Welcome Pm Modi என டிரெண்ட் செய்து வருகின்றனர்.
நேற்று பிரதமரின் சென்னை வருகைக்கு எதிராக கருத்துப் பதிவிடுவோர் மீது கண்காணித்து நடவடிக்கை எடுக்கப்படும் என சென்னை காவல் ஆணையர் சங்கர் ஜிவால் பேசியது குறிப்பிடத்தக்கது.
மேலும் செஸ் ஒலிம்பியாட் நிகழ்ச்சி நடக்கும் இடங்களில் நாட்டின் அடையாளமான பிரதமர் மோடியின் படம் இல்லை என்பதை, முதலமைச்சர் ஸ்டாலின் கவனித்து, எல்லா இடங்களிலும் அவரது படத்தை இடம்பெறச் செய்ய வேண்டும் என புதுச்சேரி துணைநிலை ஆளுநர் தமிழிசை செளந்தரராஜன் தெரிவித்துள்ளார்.
இதையும் படிங்க: செஸ் ஒலிம்பியாட் ஜோதி வரவேற்பு: குத்தாட்டம் போட்டு வரவேற்ற வாணியம்பாடி வட்டாட்சியர்!
