மீண்டும் இணையும் கர்ணன் கூட்டணி - பிரமாண்டமாக உருவாகும் புதிய படம்!

கர்ணன் படதிற்குப்பின் மீண்டும் நடிகர் தனுஷ், மாரி செல்வராஜ் இயக்கத்தில் நடிக்க போவதாக அதிகாரப் பூர்வமாக அறிவிக்கப்பட்டுள்ளது.

சென்னை: தமிழ் சினிமாவில் முன்னனி நடிகராக வலம் வருபவர் நடிகர் தனுஷ். தமிழ் மொழி தவிரத்து தெலுங்கு, இந்தி என சென்று ஹாலிவுட் படத்திலும் நடித்து தமிழ் சினிமாவிற்கு பெருமை சேர்த்தவர். இவரது நடிப்பில் கடைசியாக வெளிவந்த வாத்தி திரைப்படம் தமிழ், தெலுங்கு என இரு மொழிகளிலும் வெளியாகி வெற்றி பெற்றது. இந்தத் திரைப்படம் தனுஷின் திரையுலகில் மற்றுமொரு ரூ‌.100 கோடி வசூல் ஈட்டியப் படமாக அமைந்துள்ளது.

இதனைத்தொடர்ந்து தற்போது அருண் மாதேஸ்வரன் இயக்கத்தில் கேப்டன் மில்லர் என்ற படத்தில் நடித்து வருகிறார் நடிகர் தனுஷ். இதற்காக நீண்ட முடி வளர்த்து வருகிறார். இந்நிலையில் இயக்குனர் மாரி செல்வராஜ் இயக்கத்தில் மீண்டும் ஒரு படத்தில் நடிகர் தனுஷ் நடிக்க உள்ளார். மாரி செல்வராஜ் இயக்கத்தில் தனுஷ் ஏற்கனவே கர்ணன் படத்தில் நடித்திருந்தார் என்பது குறிப்பிடதக்கது.

இப்படம் கரோனா சமயத்தில் வெளியாகி மிகப் பெரிய வெற்றியை பெற்றது. தற்போது மீண்டும் இந்த வெற்றிக் கூட்டணி இணைந்துள்ளது. இத்திரைப்படத்தை ZEE Studios மற்றும் Wunderbar Films ஆகிய நிறுவனங்கள் இணைந்து தயாரிக்கின்றன. தனுஷின் வொண்டர்பார் நிறுவனம் நீண்ட இடைவெளிக்குப் பிறகு மீண்டும் படத் தயாரிப்பில் ஈடுபட்டுள்ளது.

விமர்சன ரீதியாகவும் வணிக ரீதியாகவும் பாராட்டுக்களைக் குவித்து, வெற்றி பெற்ற ‘கர்ணன்’ திரைப்படத்தின் இரண்டாம் ஆண்டு நிறைவைக் குறிக்கும் வகையில், ZEE Studios மற்றும் Wunderbar Films நிறுவனங்கள் இந்த புதிய படத்தின் அறிவிப்பை வெளியிட்டுள்ளன. நடிகர் தனுஷின் திரை வரலாற்றில் மிகப்பெரிய பொருட்ச்செலவில் மிகப்பிரமாண்டமாக இப்படம் உருவாகவுள்ளது எனவும் தெரிவிக்கப்பட்டுள்ளது. மேலும் தனுஷின் Wunderbar Films சிறிது காலத்திற்குப் பிறகு மீண்டும் இப்படம் மூலம் தயாரிப்பில் இறங்குவது ரசிகர்கள் மத்தியில் இப்படத்திற்கான எதிர்பார்ப்பை அதிகரித்துள்ளது.

ZEE Studios மற்றும் Wunderbar Films நிறுவனங்கள் இணைந்து தயாரிக்கும் இந்தப் படத்தில் பல்வேறு பிராந்திய திரைப்படத் துறைகளைச் சேர்ந்த பிரபல நடிகர்கள் மற்றும் முன்னணி தொழில்நுட்ப வல்லுநர்கள் இணைந்து பணியாற்றவுள்ளனர். இது குறித்த அதிகாரப்பூர்வ அறிவிப்புகள் விரைவில் வெளியிடப்படும் என்று அறிவிக்கப்பட்டுள்ளது.மீண்டும் மாரி செல்வராஜ் மற்றும் தனுஷ் கூட்டணி இணைந்துள்ளதால் ரசிகர்கள் மத்தியில் மிகுந்த எதிர்பார்ப்பை பெற்றுள்ளது.

இதையும் படிங்க: மீண்டும் இணைந்த ராஜா ராணி கூட்டணி - நயன்தாரா 75 அப்டேட்!