இந்தியா - வங்கதேச அணிகளுக்கிடையேயான இரண்டாவது டெஸ்ட் போட்டி இன்று கொல்கத்தா ஈடன் கார்டன் மைதானத்தில் தொடங்கியது. பகலிரவு ஆட்டமாக நடைபெறும் இப்போட்டிக்காக பல்வேறு ஏற்பாடுகள் செய்யப்பட்டிருந்தது. இதில் டாஸ் வென்று முதல் இன்னிங்ஸை தொடங்கிய வங்கதேச அணி வரிசையாக விக்கெட்டுகளை இழந்து தடுமாறியது.
இந்திய வேகப்பந்துவீச்சை தாக்குபிடிக்க முடியாமல் வங்கதேச அணி முதல் இன்னிங்ஸில் 106 ரன்களுக்குள் சுருண்டது. அந்த அணியில் அதிகபட்சமாக ஷத்மன் இஸ்லாம் 29 ரன்களும், லிட்டன் தாஸ் 24 ரன்களும் எடுத்தனர். இந்திய பந்துவீச்சில் இஷாந்த் ஐந்து, உமேஷ் மூன்று, ஷமி இரண்டு விக்கெட்டுகளையும் வீழ்த்தினர்.
இதைத் தொடர்ந்து களமிறங்கிய இந்திய அணியின் தொடக்க வீரர் மயாங்க் அகர்வால் 14 ரன்னில் ஆட்டமிழந்தார். அதன்பின் ஜோடி சேர்ந்த ரோஹித் - புஜாரா இணை நிதானமாக ரன் குவித்தது. இதனால் இந்திய அணி தேநீர் இடைவேளை வரை ஒரு விக்கெட் இழப்பிற்கு 35 ரன்கள் எடுத்திருந்தது.
அதன்பின் தேநீர் இடைவேளைக்குப்பின் திரும்பிய ரோஹித், எபாதத் ஹூசைன் பந்துவீச்சில் அடுத்தடுத்து இரண்டு பவுண்டரிகளை அடித்து அசத்தினார். இருப்பினும் அதற்கடுத்த பந்திலேயே அவர் 21 ரன்களில், எல்பிடபுள்யு முறையில் ஆட்டமிழந்தார். இதைத் தொடர்ந்து தற்போது இந்திய அணியின் கேப்டன் கோலி - புஜாரா ஆகியோர் விளையாடி வருகின்றனர்.
