'பரியேறும் பெருமாள்' பட இயக்குநர் மாரி செல்வராஜ், தற்போது தனுஷை வைத்து 'கர்ணன்' என்ற படத்தை இயக்கி வருகிறார். மலையாள நடிகை ரெஜிஷா விஜயன் தமிழில் இப்படம் மூலம் அறிமுகமாகிறார்.
இவர்களுடன் நடிகர்கள் லால், நட்டி, யோகிபாபு, லக்ஷ்மி பிரியா சந்திரமௌலி, கௌரி ஜி கிஷன் உள்ளிட்ட பலர் முக்கிய கதாபாத்திரங்களில் நடிக்கின்றனர். மாஞ்சோலை தேயிலைத் தோட்டத் தொழிலாளர்களின் வாழ்வியல், தேயிலை தோட்டத் தொழிலாளர்களின் படுகொலையை மையமாக வைத்து உருவாகிவரும் இந்தப் படத்தை கலைப்புலி எஸ்.தாணு தயாரிக்கிறார். சந்தோஷ் நாராயணன் இசையமைக்கிறார்.
திருநெல்வேலி, மாஞ்சோலை உள்ளிட்ட அதன் சுற்றுவட்டாரப் பகுதிகளில் படப்பிடிப்பு பணிகள் விறுவிறுப்புடன் நடைப்பெற்று வந்தது. தற்போது இதன் படப்பிடிப்பு பணிகள் அனைத்தும் முடிந்து இறுதிகட்ட பணிகள் நடைபெறவுள்ளதாக தகவல்கள் வெளியாகியுள்ளன. எனவே புதிய அப்டேட்களை படக்குழுவினர் விரைவில் வெளியிடுவார்கள் என எதிர்பார்க்கலாம்.
