தமிழ், தெலுங்கு என இரண்டு மொழியிலும் கலக்கிய நடிகை ஜோதிகா நடிகர் சூர்யாவை திருமணம் செய்துகொண்டபின் சினிமாவிலிருந்து விலகியிருந்தார். இவர் தமிழ் சினிமாவில் இரண்டாவது இன்னிங்ஸை 36 வயதினிலே படத்தின் மூலமாகத் தொடங்கினார்.
அதன்பின் ஹீரோயினுக்கு முக்கியத்துவம் அளிக்கும் கதைகளை மட்டும் தேர்ந்தெடுத்து நடித்துவரும் ஜோதிகா நடிப்பில் சமீபத்தில் வெளியான 'ஜாக்பாட்' திரைப்படம் கலவையான விமர்சனங்களைப் பெற்றது.
அதைத் தொடர்ந்து அவர் அடுத்ததாக மைத்துனர் கார்த்தியுடன் இணைந்து ஜீத்து ஜோசப் இயக்கும் பெயரிடப்படாத படத்திலும் 'பொன்மகள் வந்தாள்' என்ற படத்திலும் நடித்துவருகிறார். இது தவிர சிறுத்தை சிவா - ரஜினி கூட்டணியில் உருவாகும் படத்திலும் ஜோதிகா நடிக்க வாய்ப்புள்ளதாகத் தெரிகிறது.
இதனிடையே இயக்குநர் ஆர். சரவணன் இயக்கும் ஒரு படத்தில் ஜோதிகா நடிக்கவுள்ளதாகத் தகவல் வெளியாகியுள்ளது. இப்படத்தின் முக்கிய வேடத்தில் இயக்குநரும் நடிகருமான சசிகுமார் நடிக்கவுள்ளதாகவும் தகவல் வெளியாகியுள்ளது.
சூர்யாவின் 2டி என்டர்டெயின்மென்ட் தயாரிக்கும் இத்திரைப்படத்தில் நடிகர் சமுத்திரக்கனி, சூரி உள்ளிட்டோரும் நடிக்கின்றனர். விரைவில் இத்திரைப்படத்தின் ஷூட்டிங் தொடங்கவுள்ளது.
இந்தப் படத்தின் மூலம் ஜோதிகாவும் சசிகுமாரும் முதன்முறையாக இணையவுள்ளனர் என்பது குறிப்பிடத்தக்கது.
