நடிகர் தனுஷ், 'ராஞ்சனா' படம் மூலம் 2013ஆம் ஆண்டு பாலிவுட்டில் கால்பதித்தார். இதையடுத்து அமிதாப் பச்சனுடன் இணைந்து ஷமிதாப் படத்தில் நடித்தார். அப்படம் ரசிகர்களிடையே வரவேற்பு கிடைக்காமல் தோல்வியைத் தழுவியது. இதனால் தனுஷ் பாலிவுட் படங்களுக்கு சிறிய இடைவெளி விட்டிருந்தார்.
இதற்கிடையில் தற்போது மீண்டும் தனுஷ், பாலிவுட்டில் ஆனந்த் எல். ராய் இயக்கத்தில் உருவாகிவரும் 'அட்ராங்கி ரே' என்ற படத்தில் நடிக்க ஒப்பந்தமாகியுள்ளார். சாரா அலிகான் கதாநாயகியாக நடிக்க அக்ஷய் குமார் சிறப்பு வேடத்தில் நடிக்கவுள்ளார். இந்தப் படத்திற்கு இசைப்புயல் ஏ.ஆர். ரஹ்மான் இசையமைக்கிறார். இதுகுறித்த அறிவிப்பு சமீபத்தில் வெளியாகி ரசிகர்களை குஷிப்படுத்தியது. மேலும், இதன் ஃபர்ஸ்ட்லுக் புகைப்படங்களும் வெளியாகி ரசிகர்களை வெகுவாகக் கவர்ந்தது.
இதனிடையே படத்தில் நடிக்கும் நடிகர், நடிகைகள், தொழில்நுட்பக் கலைஞர்கள், படத்தின் வெளியீட்டுத் தேதி உள்ளிட்ட பல தகவல்கள் அடங்கிய வண்ணமயமான காணொலியை அக்ஷய் குமார் சமீபத்தில் வெளியிட்டார். இதனையடுத்து இப்படத்தின் படப்பிடிப்பு இன்று முதல் வாரணாசியில் தொடங்க உள்ளதாக தகவல்கள் தெரிவிக்கின்றன. இப்படத்தை அடுத்தாண்டு காதலர் தினத்தில் வெளியிட படக்குழு திட்டமிட்டுள்ளது.
தனுஷ் நடிப்பில் உருவாகியுள்ள, 'ஜகமே தந்திரம்' படம் மே 1ஆம் தேதி வெளியாகிறது. மேலும் மாரி செல்வராஜ் இயக்கத்தில் தனுஷ் நடிப்பில் உருவாகிவரும் 'கர்ணன்' படத்தின் இறுதிகட்ட படப்பிடிப்பு பணிகள் விறுவிறுப்புடன் நடைபெற்றுவருகிறது.
