சென்னை பல்லாவரத்தையடுத்த திருநீர்மலையைச் சேர்ந்தவர் செல்வி (60). திருநீர்மலை மற்றும் அதன் சுற்றுப்பகுதிகளில் சட்டவிரோத மது பாட்டில் விற்பனை செய்வதை தொழிலாக வைத்திருந்த இவர் பலமுறை சிறைக்கும் சென்றுள்ளார்.
தற்போது செல்விக்கு உடல்நலம் சரியில்லாமல் இருப்பதால், அவருடைய பேரன்களான ஞானபிரகாஷ் என்கிற டேனியல் (21) மற்றும் சந்திரபோஸ் (19) ஆகிய இருவரும், மது பாட்டில் விற்பனைத் தொழிலை செய்து வருகின்றனர். நாளுக்குநாள் இது அதிகரிக்கவே, அப்பகுதி மக்கள் சங்கர் நகர் காவல் நிலையத்திற்கு தகவல் கொடுத்துள்ளனர்.
தகவலின் அடிப்படையில், இருசக்கர வாகனத்தில் மதுபாட்டில்களை வைத்து விற்பனை செய்து வந்த ஞானபிரகாஷ் மற்றும் சந்திரபோஸ் ஆகிய இருவரையும் காவல் துறையினர் கைது செய்தனர்.
பின்னர் அவர்களிடமிருந்து இருசக்கர வாகனம் மற்றும் 15 ஆயிரம் ரூபாய் மதிப்புள்ள 90 மதுபாட்டில்கள் பறிமுதல் செய்யப்பட்டன. பின்னர், அவர்கள் மீது வழக்குப்பதிவு செய்த காவல் துறையினர் நீதிமன்றத்தில் ஆஜர்படுத்தி புழல் சிறையில் அடைத்தனர்.
இதையும் படிங்க: மதுபோதையில் கல்லூரி மாணவனை கத்தியால் குத்திக் கொலை!
