அமெரிக்க முன்னாள் அதிபர் டொனால்டு ட்ரம்ப், தனது மனைவி இவானா ட்ரம்ப் (73) காலமானதாக, தான் சமூக வலைத்தளமான ட்ரூத் சோசியலில் நேற்று (ஜூலை 14) பதிவிட்டுள்ளார்.
இது தொடர்பாக ட்ரம்ப் வெளியிட்டுள்ள பதிவில், “இவானா ட்ரம்ப் நியூயார்க் நகரில் உள்ள தனது வீட்டில் காலமானார். மிக அழகான அற்புதமான பெண்ணான இவர், ஒரு முன்னுதாரணமான வாழ்க்கையை வாழ்ந்தவர். தனது மூன்று குழந்தைகள் மீதும் அதீத பாசமும், மதிப்பும் வைத்திருந்தவர். இவானாவின் ஆன்மா சந்தியடையட்டும்” என குறிப்பிட்டுள்ளார்.
இவரைத் தொடர்ந்து இவானா ட்ரம்ப் மகளான இவாங்கா ட்ரம்ப், தனது தாயின் இறப்பு குறித்து பதிவிட்டுள்ளார். அதில், “எனது அம்மாவின் மறைவால் மனமுடைந்துள்ளேன். அவர் பல சிறந்த குணங்கள் கொண்டவர். எந்த ஒரு சூழலிலும் சிரிப்பை அவர் இழந்ததில்லை. அவரை இழந்து நான் வாடுகிறேன். அவரது நினைவுகள் என் மனதில் நீங்காமல் நிலைத்திருக்கும்” என குறிப்பிட்டுள்ளார்.
இவானா ட்ரம்ப், 1977ஆம் ஆண்டில் தொழிலதிபராக இருந்த டொனால்டு ட்ரம்ப்பை திருமணம் செய்து கொண்டார். 1978ஆம் ஆண்டில் இருவருக்கும் டொனால்டு ட்ரம்ப் ஜூனியர் முதல் குழந்தையாகப் பிறந்தார். பின்னர் 1981ஆம் ஆண்டு மகள் இவாங்காவும், 1984ஆம் ஆண்டில் மூன்றாவதாக மகன் எரிக்கும் பிறந்தனர்.
டொனால்டு பிரபல தொழிலதிபர் என்ற நிலையில், அவரது மனைவி இவானாவும் ட்ரம்ப்பின் தொழில்களில் பங்கெடுத்து கணவரின் தொழில் வளர்ச்சிக்கு உறுதுணையாக நின்றார். இருவருக்கும் இடையே 1992இல் விவாகரத்து ஆனது. ஹாலிவுட் நடிகையான மர்லா மப்லேஸ் என்பவருடன் டொனால்டு ட்ரம்ப்பிற்கு ஏற்பட்ட உறவே இதற்கு காரணம்.
இதையும் படிங்க: அதிபர் பதவியை ராஜினாமா செய்தார் கோத்தபய - சபாநாயகருக்கு இ - மெயில் மூலம் கடிதம்
