19ஆவது மாடியில் தீ - 'ஸ்பைடர்மேன்' அவதாரம் எடுத்த இளைஞர்!

நியூயார்க்: 19ஆவது மாடிக் கட்டடத்தில் ஏற்பட்ட தீவிபத்தில் இருந்து உயிர் தப்ப ஒருவர் ஸ்பைடர்மேன் போல் கீழே இறங்கியது அனைவரையும் ஆச்சரியத்தில் ஆழ்த்தியுள்ளது.

அமெரிக்காவின் ஃபிலாடெல்பியாவில் உள்ள 19ஆவது மாடி கட்டடத்தில் தீவிபத்து ஏற்பட்டது. காற்று பலமாக வீசியதால், அருகிலிருந்த மற்றப் பகுதிகளுக்கும் தீ மளமளவென பரவியது.

தகவலறிந்து விரைந்துவந்த தீயணைப்புப் படை வீரர்கள் கட்டடத்தில் சிக்கியிருந்தவர்களை பத்திரமாக மீட்கும் முயற்சியில் ஈடுபட்டனர். மேலும் ஹெலிகாப்டர்களும் வரவழைக்கப்பட்டன.

அப்போது தீ விபத்திலிருந்து உயிர் தப்பும் நோக்கில் 19ஆவது மாடி கட்டடத்திலிருந்து ஜன்னல் கம்பிகளை பிடித்தவாறு இளைஞர் ஒருவர் கீழே இறங்கும் காட்சியைக் கண்டு தீயணைப்புப் படையினர் அதிர்ச்சி அடைந்தனர்.

அந்த இளைஞர் சிறிதும் பதற்றமின்றி ஸ்பைடர்மேன் போல ஒவ்வொரு தளத்திலிருந்தும் கீழே குதித்து உயிர் தப்பினார். இந்த தீவிபத்தில் யாருக்கும் காயம் ஏற்படவில்லை.