நடிகர் அஜித்குமார் தமிழ் சினிமாவில் முன்னணி நடிகராக இருப்பவர். இவரது படங்கள் வெளியாகும் தினம் அவரது ரசிகர்கள் திருவிழா போல கொண்டாடுகின்றனர். தனது கடின உழைப்பால் தமிழ் சினிமாவில் அஜித் தனக்கென ஒரு மார்க்கெட்டை உருவாக்கியவர். இவர் இயக்குனர் எச்.வினோத் இயக்கத்தில் தொடர்ந்து நேர்கொண்ட பார்வை, வலிமை, துணிவு என மூன்று படங்களில் நடித்துள்ளார்.
போனி கபூர் தயாரிப்பில் கடைசியாக நடித்த துணிவு திரைப்படம் கடந்த பொங்கல் பண்டிகையை முன்னிட்டு ஜனவரி 10ஆம் தேதி திரையரங்குகளில் வெளியானது. வங்கியில் நடைபெறும் மோசடிகளை பற்றி எடுக்கப்பட்ட இப்படம் வெளியாகி பாக்ஸ் ஆபிஸில் மிகப் பெரிய வெற்றியை பெற்றது.
தமிழ் மட்டுமின்றி மற்ற மொழிகளிலும் துணிவு திரைப்படம் நல்ல வசூல் பெற்றது. இப்படத்தில் மஞ்சு வாரியர், சமுத்திரக்கனி உள்ளிட்டோர் நடித்திருந்தனர். ஜிப்ரான் இசை அமைத்திருந்தார். மூன்றாவது முறையாக அஜித் - வினோத் கூட்டணி இப்படத்திலும் தங்களது முத்திரையை பதித்தது.
’நெட்பிளிக்ஸ்’ ஓடிடி தளத்தில் துணிவு திரைப்படம் வெளியாகி அதிக பார்வையாளர்களால் ரசிக்கப்பட்ட படம் என்ற சாதனையை படைத்தது. துணிவு படத்தில் அஜித்தின் மாஸ், லுக், ஸ்டைல் எல்லாமே அனைவராலும் கொண்டாடப்பட்டது. ஒரு விதமான வில்லத்தனம் கலந்த கதாபாத்திரத்தில் அஜித் மிரட்டியிருந்தார். மைக்கேல் ஜாக்சன் போல அஜித் ஆடிய நடனம் திரையரங்குகளில் ரசிகர்கள் மத்தியில் மிகுந்த வரவேற்பைப் பெற்றது.
மேலும் சில்வா சில்லா என்ற பாடல் ஜிப்ரான் இசையில் ட்ரெண்டிங்கில் முதலிடம் பிடித்தது. இப்படி அனைத்து தரப்பு ரசிகர்களையும் கவரும் வகையில் துணிவு திரைப்படம் அமைந்தது. இந்த நிலையில் துணிவு திரைப்படம் வெளியாகி இன்று 100வது நாளை எட்டியுள்ளது. ஓடிடியில் வெளியான பின்பும் தற்போது சில திரையரங்குகளில் துணிவு திரைப்படம் ஓடி வருகிறது.
ஏற்கனவே வலிமை திரைப்படம் ரூ.100 கோடி வசூல் பட்டியலில் இணைந்திருந்த நிலையில் துணிவு திரைப்படமும் ரூ.100 கோடி வசூல் செய்து சாதனை படைத்திருந்தது. தொடர்ந்து அடுத்தடுத்து நூறு கோடி வசூல் படங்களை கொடுத்து தமிழ் சினிமாவில் தான் ஒரு வசூல் மன்னன் என்பதை நடிகர் அஜித் நிரூபித்துள்ளார்.
துணிவு படத்தின் நூறாவது நாள் வெற்றியை அஜித் ரசிகர்கள் சமூக வலைத்தளங்களில் வைரலாக்கி கொண்டாடி வருகின்றனர். ஏற்கனவே லைகா தயாரிப்பில் இயக்குனர் விக்னேஷ் சிவன் இயக்கத்தில் நடிப்பதாக இருந்த படம் கைவிடப்பட்ட நிலையில் தற்போது அஜித் அடுத்து மகிழ் திருமேனி இயக்கும் படத்தில் நடிக்க உள்ளார் என கூறப்படுகிறது. விரைவில் ‘AK62' குறித்து அதிகாரப்பூர்வ அறிவிப்பு வெளியாகும் என ரசிகர்கள் எதிர்பார்ப்பில் உள்ளனர்.
இதையும் படிங்க: "உயிர் உங்களுடையது தேவி": குந்தவையின் லேட்டஸ்ட் கிளிக்ஸ்!
