சென்னை: தமிழ் சினிமாவில் ஒரு காலகட்டத்தில் நகைச்சுவை நடிகர்களாக கவுண்டமணி, செந்தில், விவேக், வடிவேலு, சந்தானம் என அனைவரும் கோலோச்சிய காலகட்டத்தில் அவர்களுடன் இணைந்து பல துணை காமெடி நடிகர்கள் நடித்து வந்தனர். ஒவ்வொரு நடிகர்களும் தங்களுடன் ஒரு குழுவை வைத்துக்கொண்டு அவர்களுக்கு படங்களில் வாய்ப்பு வழங்கி வந்தனர்.
இதனால் அந்த சின்ன நடிகர்களின் வாழ்க்கை எந்தவித பாதிப்பும் இன்றி இருந்து வந்தனர். அதன் பின்னர் காலப்போக்கில் அந்த பெரிய நடிகர்கள் எல்லாம் கதாநாயகனாக நடிக்க ஆசைப்பட்டு பின்னாளில் காணாமல் போயினர். இதனால் சிறிய வேடங்களில் நடித்து வந்த நடிகர்களுக்கு பட வாய்ப்புகள் கிடைக்காமல் கஷ்டப்பட்டு வருகின்றனர் எனவும் கூறலாம்.
தற்போது எல்லாம் பழைய காமெடி நடிகர்களை பார்ப்பதே மிகவும் குறைந்துவிட்டது. சிலர் உயிரிழந்த நிலையில் பலரும் வாய்ப்பு கிடைக்காமல் தவிக்கிறார்கள். அது மட்டும் இல்லாமல் சிலர் உடல்நிலை சரியில்லாத காரணத்தினால் நடிப்புக்கு முழுக்கு போட்டுவிடுகின்றனர். அந்த வகையில் நகைச்சுவை நடிகராக வலம் வந்த பாவா லட்சுமணன் தற்போது உடல்நலம் சரியில்லாத காரணத்தினால் படங்களில் நடிப்பதை தவிர்த்துவிட்டார்.
நகைச்சுவை நடிகர் பாவா லட்சுமணனுக்கு 55 வயதாகும் நிலையில், இவருக்கு சர்க்கரை நோய் இருக்கிறது. அதனால் அவர் சமீப காலமாக படங்களில் நடிக்கவில்லை எனக் கூறப்படுகிறது. இதனிடையே பாவா லட்சுமணனுக்கு சர்க்கரை நோய் அதிகமானதால், அவரின் கால் கட்டை விரல் அகற்றப்பட்டு உள்ளது. அவர் தற்போது ஓமந்தூரார் அரசு மருத்துவமனையில் சிகிச்சை பெற்று வருகிறார்.
மேலும் பாவா லட்சுமணன் சூப்பர் குட் பிலிம்ஸ் நிறுவனத்தில் மேலாளராக பணிபுரிந்தவர். தமிழ் சினிமாவில் பாவா லட்சுமணன், வடிவேலுடன் இணைந்து ஏகப்பட்ட படங்களில் நடித்தார். குறிப்பாக மாயி படத்தில், "வா மா மின்னல்" என சொல்லியது முதல் "தாடி எடுக்கவே காசு இல்ல பாடி எங்க எடுக்க" என்ற காமெடி வரை பல வசனங்கள் இன்று வரை பிரபலம்.
சென்னையில் வாய்ப்பு கிடைக்காத காரணத்தினால் பெயிண்டராக 5 வருடமாக பணியாற்றி இருக்கிறார் என்றும், திருமணங்களில் பீடா கூட மடித்து கொடுத்து இருப்பதாக ஒரு முறை பேட்டி ஒன்றில் கூறியிருந்தார். மேலும் இயக்குனர் லிங்குசாமி இயக்கிய ஆனந்தம் படத்தில் திருடனாக இவர் நடித்திருந்தார். அந்த வேடத்திற்கு முதலில் வடிவேலுவைத் தான் கேட்டுள்ளனர். ஆனால் அவரது கால்ஷீட் கிடைக்காததால் பாவா லட்சுமணன் நடித்துள்ளார் என்பத் குறிப்பிடத்தக்கது.
இவரது நடிப்பை பார்த்து மம்முட்டியே இவரை கட்டியணைத்து பாராட்டியுள்ளார். தற்போது சர்க்கரை நோயால் இவரது கால் கட்டை விரல் அகற்றப்பட்டு மருத்துவமனையில் சிகிச்சை பெற்று வருகிறார். இன்னும் எத்தனையோ துணை நடிகர்கள் பட வாய்ப்புகள் இல்லாமல் வறுமையில் தனது வாழ்நாளை கழித்து வருகின்றனர் என்பது குறிப்பிடத்தக்கது.
தற்போது சர்க்கரை நோய் காரணமாக நடிகர் பாவா லட்சுமணனின் கால் கட்டை விரல் அகற்றப்பட்ட செய்தி ரசிகர்களிடையே பெரும் சோகத்தை ஏற்படுத்தியுள்ளது.
