தூத்துக்குடி:தூத்துக்குடியில் ஆயிரக்கணக்கான தொழிலாளர்களின் நலனைக் கருத்திற்கொண்டு மூடியிருக்கும் ஸ்டெர்லைட் ஆலையைத் திறக்க அரசு நடவடிக்கை எடுக்க வேண்டும். மேலும் ஆலையை விற்கும் முடிவை அதன் உரிமையாளர் கைவிட வேண்டும் என ஏற்றுமதியாளர்கள் மற்றும் ஒப்பந்ததாரர்கள் சங்கத்தினர் கேட்டுக்கொண்டுள்ளனர்.
தூத்துக்குடி ஓப்பந்தகாரர் சங்க துணைத்தலைவர் பரமசிவன் செய்தியாளர்களிடம் பேசினார். அப்போது, ‘தூத்துக்குடி மாவட்டத்தில் சுமார் 25 ஆண்டுகளாக தொழில் செய்து வருகிறோம். ஸ்டெர்லைட் நிறுவனம் மூடப்பட்ட பிறகு மிகப்பெரும் இக்கட்டான நிலைக்கு தள்ளப்பட்டு விட்டோம். இத்தொழிற்சாலையை நம்பி சுமார் 25 ஆயிரத்திற்கும் மேற்பட்ட தொழிலாளர்கள் உள்ளனர்.
இந்த தொழிலாளர்களின் குடும்பங்கள் மட்டுமல்லாது எங்களைப்போன்ற எண்ணற்ற தொழில் நிறுவனத்தினர் வாழ்வாதாரம் இழந்து இருக்கிறோம். சட்டப்போராட்டங்களை கடந்து ஆலை திறக்கப்படும் என்ற நம்பிக்கையில் இருந்தோம். ஆனால் தொழிற்சாலையை விற்பனை செய்யப்போவதாக கடந்த 10 நாட்களுக்கு முன் அறிவிப்பு வெளியானது அதிர்ச்சி அளிக்கிறது. எனவே தொழிலாளர்களின் வாழ்வாதாரத்தை கருத்தில் கொண்டு ஆலை விற்பனை முடிவை ஸ்டெர்லைட் நிறுவனம் மறுபரிசீலனை செய்ய வேண்டும்" என்று கூறினார்.
பாதிப்பு இல்லை: தூத்துக்குடி ஸ்டெர்லைட் நிறுவனத்தால் எந்தவிதமான மாசுபாடும் இல்லை. இந்த நிறுவனம் மூடப்பட்டு இருந்தபோதும் கடந்த ஆண்டு கரோனாவால் பாதிக்கப்பட்ட மக்களின் உயிரைப் பாதுகாக்க 6 மாதம் சிறப்பாக ஆக்சிஜனை உற்பத்தி செய்து மருத்துவமனைகளுக்குச் சேவை அடிப்படையில் இலவசமாகக் கொடுத்துள்ளதை அனைவரும் அறிவார்கள்.
இப்படி இருக்க, இந்த நிறுவனத்தால் மாசு ஏற்படுகிறதா? என்பதைத் தமிழ்நாடு அரசு உயர்மட்ட நிபுணர் குழு ஒன்றை நியமித்து அதன்மூலமாக ஆய்வு செய்திடவேண்டும். தொழிற்சாலை இயக்கப்படும் காலத்தில் தொழிற்சாலையால் மாசுக்கள் எதுவும் ஏற்படுகிறதா? என்பதை இந்த திறன் வாய்ந்த நிபுணர்கள் குழு முழுமையாக ஆய்வு செய்து அந்த குழு தரும் அடிப்படையில் நிறுவனத்தின் மீது தமிழ்நாடு அரசு நடவடிக்கை எடுக்கலாம் என தெரிவித்தார்.
வேலைவாய்ப்பு இழப்பு: தமிழ்நாட்டைப் பொறுத்தவரை அரசு நிர்ணயம் செய்துள்ள அடிப்படையில் தொழிற்சாலைகளுக்கான உற்பத்தி குறியீட்டு இலக்கை குறிப்பிட்டபடி எட்ட வேண்டுமெனில் ஸ்டெர்லைட் தொழிற்சாலை மீண்டும் செயல்படுவது மிகவும் அவசியமாகும்.
ஸ்டெர்லைட் தொழிற்சாலை மூடப்பட்டதால் தென்தமிழகம் வேலைவாய்ப்பு இழப்புடன், மிகப்பெரும் பொருளாதார இழப்பினை சந்தித்துள்ளது. காப்பர் உற்பத்தியில் இந்த நிறுவனம் முதலிடத்தில் இருந்ததுடன் இங்கிருந்து உலக நாடுகளுக்குக் காப்பர் ஏற்றுமதி செய்யப்பட்டது. ஆனால், தற்போது உலக நாடுகளிலிருந்து அதனை இறக்குமதி செய்யும் நிலை ஏற்பட்டுள்ளது என்பதை மத்திய, மாநில அரசுகள் புரிந்துகொள்ளவேண்டும்.
எனவே, ஸ்டெர்லைட் தொழிற்சாலை செயல்படுவதற்கு தமிழ்நாடு முதலமைச்சர் மு.க.ஸ்டாலின் உரிய அனுமதி வழங்கவேண்டும். இந்த தொழிற்சாலை இயக்கப்படும் 6 மாத காலத்தில் இதனால் என்ன என்ன பாதிப்புகள் ஏற்படுகிறது என்பதை அரசு நியமிக்கும் நிபுணர்கள் குழு மூலமாகக் கண்டறிந்து அதன்பிறகு அந்த நிறுவனத்தின் மீது தகுந்த நடவடிக்கை எடுக்கலாம்.
ஸ்டெர்லைட் நிறுவனத்தால் நேரடியாக மட்டுமின்றி மறைமுகமாக சுமார் 25ஆயிரம் தொழிலாளர்களின் குடும்பங்கள் வேலைவாய்ப்பினை இழந்து பரிதவித்து வருகின்றனர். இந்த தொழிலாளர்களின் வாழ்வாதாரத்தைக் கருத்தில்கொண்டு தமிழக அரசு இதில் உரிய நடவடிக்கையை விரைந்து எடுக்க வேண்டும் என்று வலியுறுத்திக் கேட்டுக்கொள்கிறோம்" என்றார்.
பேட்டியின் போது தூத்துக்குடி ஷிப்பிங் ஏஜென்சி கணேஷ்குமார், தூத்துக்குடி மக்கள் வாழ்வாதார பாதுகாப்பு சங்கத் தலைவர் தியாகராஜன், ஷிப்பிங் நிறுவனத்தை சார்ந்த கணேசன் மற்றும் ஸ்டெர்லைட் ஆதரவு கூட்டமைப்பினர் உடனிருந்தனர்.
இதையும் படிங்க:தூத்துக்குடி ஸ்டெர்லைட் ஆலையை விற்பனை செய்யப்போவதாக அறிவிப்பு
