இலவசத் திட்டங்களை பட்ஜெட்டில் தவிர்க்கவும் - காங்கிரஸ் வலியுறுத்தல்

தமிழ்நாட்டில் கடன்சுமை அதிக அளவில் இருப்பதால், வரும் நிதி நிலை அறிக்கையில் தேவையற்ற இலவசத் திட்டங்களை அறிவிக்கக் கூடாது என தமிழ்நாடு காங்கிரஸ் கட்சியின் பொதுச்செயலாளர் அருள் அன்பரசு வலியுறுத்தினார்.

சென்னை: தமிழ்நாட்டில் காங்கிரஸ் பொதுச்செயலாளர் அருள் அன்பரசு ஈடிவி பாரத் தமிழ்நாடு ஊடகத்திற்கு சிறப்புப் பேட்டியளித்தார்.

அப்போது அவர், 'தமிழ்நாட்டில் நிதிநிலை குறித்து தமிழ்நாடு நிதியமைச்சர் பழனிவேல் தியாகராஜன் ஆகஸ்ட் 9ஆம் தேதி வெள்ளை அறிக்கை வெளியிட்டார். அதில் தமிழ்நாடு அரசின் கடன் சுமை 5 லட்சத்து 70 ஆயிரத்து 189 கோடியாக உள்ளது. இதற்குத் தேவையான வட்டியை செலுத்துவதற்கு பெரும்பகுதி செலவாகிறது எனத் தெரிவித்தார்.

இந்நிலையில், நாளை (ஆகஸ்ட் 13) நடக்கவிருக்கும் நிதி நிலை அறிக்கையில் தேவையற்ற இலவசத் திட்டங்களை குறைக்க வேண்டும்.

கரோனா தொற்று காலத்தில் நான்காயிரம் நிதி கொடுத்தது, பெண்களுக்கு மாதம் ஆயிரம் ரூபாய் ஊக்கத்தொகை வழங்கப்படும் என்ற அறிவிப்பை நிதிநிலை சரியான பின்னர் செயல்படுத்தலாம்.

திமுக தேர்தல் அறிக்கையில் கூறியுள்ள ஊக்கத்தொகை, உரிமைத் தொகை போன்ற இலவசத் திட்டங்களை நிதிநிலை அறிக்கை சரியான பின்னர் செயல்படுத்த வேண்டும்.

தற்போது வரக்கூடிய நிதிநிலை அறிக்கையில், மிகவும் முக்கியமான வளர்ச்சி திட்டங்களுக்கு மட்டுமே நிதியை ஒதுக்க வேண்டும்.

தமிழ்நாட்டின் நிதிநிலை சீரழிந்ததற்கு கடந்த 10 ஆண்டுகளாக அதிமுக ஆட்சியில் நடைபெற்ற நிர்வாகத் திறமை இன்மையே காரணம்' என அருள் அன்பரசு கூறினார்.