அடித்தட்டு மக்களுக்கு நீதி கிடைக்கும் வகையில் செயல்படுவேன் - தலைமை நீதிபதி முனீஸ்வர் நாத் பண்டாரி

அடித்தட்டு மக்களுக்கும் நீதி கிடைக்கும் வகையில் செயல்படுவேன் என சென்னை உயர்நீதிமன்ற தலைமை நீதிபதியாக பொறுப்பேற்றுக் கொண்ட நீதிபதி முனீஸ்வர் நாத் பண்டாரி தெரிவித்துள்ளார்.

சென்னை: அலஹாபாத் உயர்நீதிமன்ற மூத்த நீதிபதியான முனீஷ்வர்நாத் பண்டாரி, சென்னை உயர்நீதிமன்ற நீதிபதியாக மாற்றப்பட்டார். கடந்த ஆண்டு நவம்பர் 22-இல் சென்னை உயர் நீதிமன்ற நீதிபதியாக பதவியேற்ற நீதிபதி முனீஷ்வர்நாத் பண்டாரி, பொறுப்பு தலைமை நீதிபதியாக நியமிக்கப்பட்டார்.

அது முதல் சென்னை உயர் நீதிமன்றத்தின் பொறுப்பு தலைமை நீதிபதியாக, பதவி வகித்து வரும் அவரை, சென்னை உயர் நீதிமன்ற தலைமை நீதிபதியாக நியமிக்க, உச்ச நீதிமன்ற கொலிஜியம், பரிந்துரை செய்தது.

அதனை ஏற்ற குடியரசு தலைவர், நீதிபதி முனீஷ்வர்நாத் பண்டாரியை, சென்னை உயர் நீதிமன்ற தலைமை நீதிபதியாக நியமித்து உத்தரவு பிறப்பித்தார். இதனையடுத்து சென்னை ஆளுநர் மாளிகையில் இன்று (பிப்ரவரி 14)நடைபெற்ற விழாவில் தலைமை நீதிபதியாக அவர் பதவியேற்றுக்கொண்டார். அவருக்கு ஆளுநர் ஆர்.என். ரவி பதவிப்பிரமாணம் செய்து வைத்தார்.

இந்நிகழ்ச்சியில் தமிழ்நாடு முதலமைச்சர் ஸ்டாலின் மற்றும் அமைச்சர்கள், முன்னாள் அமைச்சர்கள் கலந்து கொண்டனர். இதையடுத்து தலைமை நீதிபதியாக பொறுப்பேற்றுக் கொண்ட நீதிபதி முனீஸ்வர் நாத் பண்டாரிக்கு சென்னை உயர்நீதிமன்றத்தில் சிறப்பான வரவேற்பு அளிக்கப்பட்டது.

அப்போது பேசிய முனீஸ்வர் நாத் பண்டாரி, ”அடித்தட்டு மக்களுக்கும் நீதி கிடைக்கும் வகையில் செயல்படுவேன். மற்ற மாநிலங்களை விட தமிழ்நாட்டை அதிகமான நேசிப்பதாக தெரிவித்தார்.

மேலும்பொறுப்பு தலைமை நீதிபதியாகவும், தலைமை நீதிபதியாகவும் பொறுப்பேற்ற போது கிடைத்த வரவேற்பை அதிர்ஷ்டமாக கருதுவதாக கருதுகிறேன்.

கடந்த 2 மாதங்களில் வழக்கு விசாரணை செய்வதற்கு சக நீதிபதிகளின் ஆதரவு அதிகமாக கிடைத்தது. நீண்ட கால பிரச்சனையாக உள்ள கீழமை நீதிமன்ற காலி பணியிடங்களை நிரப்ப முயற்சிகள் மேற்கொள்ளப்படும்.

நீண்ட கால வழக்குகளுக்கு விரைவில் தீர்வு காண ஏதுவாக அனைத்து தரப்பினரும் தன்னை எந்த தடையும் இன்றி எப்போது வேண்டுமானாலும் நேரில் சந்திக்கலாம். உறுதியாக சொல்கிறேன், புகழ்பெற்ற சார்ட்டெட் நீதிமன்றத்தின் வளர்ச்சிக்கு என்னுடைய பங்களிப்பாக என்ன செய்ய முடியுமோ? அதை நிச்சயம் செய்வேன் எனவும் தெரிவித்தார்.

இந்த நிகழ்ச்சியில், தமிழ்நாடு பார்கவுன்சில் தலைவர் அமல்ராஜ், சென்னை உயர்நீதிமன்ற வழக்கறிஞர் சங்க தலைவர் மோகன கிருஷ்ணன், பெண் வழக்கறிஞர் சங்கம் மற்றும் லா அசோசியேசன் சார்பில் கலந்து கொண்டனர்.

இதையும் படிங்க: 'நகைக்கடன் தள்ளுபடி; உதயநிதியின் பொய்யான வாக்குறுதியை நம்பி ஏமாந்த மக்கள்!'