சென்னை: ராயப்பேட்டையில் உள்ள அதிமுக தலைமை அலுவலகமான எம்ஜிஆர் மாளிகையில் நகர்ப்புற உள்ளாட்சித் தேர்தலை சந்திப்பது, கூட்டணி இடப்பங்கீடு தொடர்பான ஆலோசனைக் கூட்டம் நடைபெற்றது.
அதிமுக ஒருங்கிணைப்பாளர் ஓ. பன்னீர்செல்வம், இணை ஒருங்கிணைப்பாளர் எடப்பாடி பழனிசாமி, முன்னாள் அமைச்சர் ஜெயக்குமார், கேபி முனுசாமி ஆகியோர் இந்த ஆலோசனைக் கூட்டத்தில் பங்கேற்றனர்.
காலை 10:30 மணியளவில் ஆலோசனைக் கூட்டம் தொடங்கியது.
ஆலோசனைக் கூட்டத்திற்கு செல்வதற்கு முன்பாக எடப்பாடி பழனிசாமி, 'அதிமுக போட்டியிட விரும்பும் இடங்களை பாஜக கேட்கிறது' என்றார். ஆலோசனைக் கூட்டம் முடிந்த பின்னர் ஓ. பன்னீர்செல்வம் 'விரைவில் வேட்பாளர் பட்டியல் வெளியிடப்படும்' எனத் தெரிவித்தார்.
பின்னர் செய்தியாளர்களிடம் பேசிய அமைச்சர் ஜெயக்குமார் , "கூட்டணிப் பேச்சுவார்த்தை தொடர்பாக ஒருங்கிணைப்பாளர்கள் தலைமையில் தலைமை கழக நிர்வாகிகள் ஆலோசனை மேற்கொண்டோம். பாஜகவுடன் பேச்சுவார்த்தை தொடர்ந்து நடைபெற்று வருகிறது.
பாதிப்பு எதுவும் ஏற்படாத வகையில் உடன்பாடுகள் எட்டப்படும். சுமுக சூழ்நிலையில் ஒருமித்த கருத்தோடு எத்தனை இடங்கள் ஒதுக்கீடு என்பதை கட்சி முடிவு செய்யும்.
அதிருப்தியை வேகமாக சம்பாதித்துள்ள கட்சி திமுக. அதிமுக அரசின் சாதனைகளை மக்கள் இன்று நினைத்துப் பார்க்கிறார்கள். திமுக தேர்தல் வாக்குறுதிகளை காற்றில் பறக்கவிட்டு நிறைவேற்றாத சூழ்நிலையில் இருக்கிறது.
பொங்கல் தொகுப்பில் ரூ. 500 கோடி அளவில் ஊழல் நடந்துள்ளது. சிபிஐ விசாரிக்க அதிமுக சார்பில் வழக்குத் தொடர்ந்துள்ளோம்.
அதனை உறுதிப்படுத்தும்விதமாக தரக்கட்டுப்பாட்டு மேலாளர் பணியிடை நீக்கம் செய்யப்பட்டுள்ளார். மிளகு என்று சொல்லி பருத்திக்கொட்டை, உருகிய வெல்லம், பத்து ரூபாய்க்கு கரும்பு வாங்கிக் கொடுத்துள்ளனர்.
பொங்கல் தொகுப்பில் ரூ. 500 கோடிக்கும் மேல் தில்லுமுல்லு திராவிட முன்னேற்றக் கழக அரசு ஊழல் செய்துள்ளது. சிபிஐ விசாரித்தால் மாட்டுவார்கள்.
தார்மீக அடிப்படையில் உணவுத்துறை அமைச்சர் ராஜினாமா செய்ய வேண்டும் என்பது தான் ஆரோக்கியமான விஷயம்.
இல்லையென்றால் பணி நீக்கம் செய்யப்பட வேண்டும். சிபிஐ விசாரித்தால் முதலமைச்சரும் பதில் சொல்ல வேண்டிய கட்டாயம் இருக்கிறது" எனத் தெரிவித்தார்.
இதையும் படிங்க: ஸ்டெர்லைட் துப்பாக்கிச்சூடு விசாரணை: 36ஆவது கட்ட அமர்வுடன் நிறைவுபெற வாய்ப்பு
