கரோனா நோய்க் கிருமியின் பரவலைத் தடுப்பதில் மத்திய - மாநில அரசுகளின் செயல்பாடுகள் குறித்து திமுக தலைவர் ஸ்டாலின் தலைமையில் அனைத்துக் கட்சி கூட்டம் காணொலி காட்சி மூலம் நடைபெற்றது. இதில் காங்கிரஸ் மாநில தலைவர் கே.எஸ். அழகிரி, மார்க்சிஸ்ட் கட்சி மாநில செயலாளர் கே.பாலகிருஷ்ணன், இந்திய கம்யூனிஸ்ட் மாநில செயலாளர் முத்தரசன், மதிமுக பொதுச்செயலாளர் வைகோ, கொங்கு நாடு மக்கள் தேசிய கட்சித் தலைவர் ஈஸ்வரன், ஐஜேகே கட்சித் தலைவர் பச்சை முத்து, விசிக தலைவர் திருமாவளவன், இந்திய யூனியன் முஸ்லீம் லீக் கட்சித் தலைவர் காதர் மொய்தீன், மனிதநேய மக்கள் கட்சித் தலைவர் ஜவாஹிருல்லா உள்ளிட்டோர் பங்கேற்றனர்.
முன்னதாக, சென்னை அண்ணா அறிவாலயத்தில் திமுக தலைமையில் அனைத்துக் கட்சி கூட்டம் நேற்றைய தினம் நடைபெற இருந்தது. நாடு முழுவதும் ஊரடங்கு உத்தரவு கடைபிடிக்கப்பட்டு வருவதால், அனைத்துக் கட்சி கூட்டத்திற்கு தேனாம்பேட்டை காவல் துறை அனுமதி அளிக்க மறுத்துவிட்டது. திமுக தரப்பில் விளக்கம் அளித்தும் அதை காவல் துறையினர் ஏற்கவில்லை. இச்சூழலில் திமுக சார்பாக அனைத்துக் கட்சிக் கூட்டம் இன்று காணொலி காட்சி மூலம் நடைபெற்றது.
இதன் பின்னர் காணொலி வாயிலாக செய்தியாளர்களிடம் பேசிய திமுக தலைவர் ஸ்டாலின், முன்னெச்சரிக்கை நடவடிக்கை எடுக்க மத்திய மாநில அரசுகள் சுணக்கம் காட்டிய நிலையில் அதை கண்டிக்கும் விதமாகவும், அரசின் செயல்பாடுகளை வேகப்படுத்துவதற்காகவும் இந்த அனைத்துக் கட்சி கூட்டம் கூட்ட நாங்கள் முடிவுசெய்தோம். நியாயமாக ஆளும் கட்சி, அனைத்துக் கட்சி கூட்டம் கூட்டியிருக்க வேண்டும். பலமுறை எதிர்க்கட்சிகள் மூலம் கோரிக்கை வைத்தோம். இது அரசியல் செய்ய நேரம் இல்லை என அலட்சியம் செய்தனர்.
இவ்வேளையில் இன்று நடைபெற்ற அனைத்துக் கட்சிக் கூட்டத்தில் முக்கிய தீர்மானங்கள் நிறைவேற்றப்பட்டன. அதன்படி கரோனா தொற்றினால் உயிரிழந்தவர்களின் குடும்பத்திற்கு ஒரு கோடி ரூபாய் நிவாரணம் வழங்க வேண்டும், குடும்ப அட்டைதாரர்களுக்கு ரூ. 5 ஆயிரம் உதவித்தொகை வழங்க வேண்டும், கரோனா தடுப்பு பணிகளில் ஈடுபடுபவர்களுக்கு சிறப்பூதியம் வழங்க வேண்டும் உள்ளிட்ட தீர்மானங்கள் நிறைவேற்றப்பட்டுள்ளதாக திமுக தலைவர் ஸ்டாலின் தெரிவித்தார்.
