தமிழ்நாடு சட்டப்பேரவையில் தாக்கல் செய்யப்பட்ட நிதிநிலை அறிக்கையின் கூட்டத்தொடரின் 2ஆவது அமர்வு சபாநாயகர் தனபால் தலைமையில் நடைபெற்று வருகிறது. இன்று ஊரக உள்ளாட்சித் துறை மானியக் கோரிக்கை மீதான விவாதம் நடைபெற்றது. சட்டப்பேரவையில் நேரமில்லா நேரத்தின் போது, திமுக உறுப்பினர்கள் எழுப்பிய கேள்விகளுக்கு முதலமைச்சர் எடப்பாடி பழனிசாமியும் உள்ளாட்சித் துறை அமைச்சர் எஸ்.பி.வேலுமணியும் பதிலளித்தனர்.
இதனிடையே, உள்ளாட்சி தேர்தல் தொடர்பாகவும், மறைமுகத் தேர்தல் தொடர்பாகவும் கேள்வி எழுப்பிய தி.மு.க. கொறடா சக்கரபாணிக்கு முதலமைச்சர் எடப்பாடி பழனிசாமி, ”நேரடி, மறைமுக தேர்தல் குறித்து அப்போதைய சூழ்நிலையின் அடிப்படையிலேயே முடிவுகள் எடுக்கப்பட்டது.
நீங்கள் கடனை தள்ளுபடி செய்வோம் என மக்களிடம் பொய்யான வாக்குறுதிகளை அளித்து பரப்புரைகளை மேற்கொண்டீர்கள். அதை நம்பி மக்கள் வாக்களித்தார்கள். உண்மை நிலை தெரிந்த பின்னர், எங்களுக்கு வெற்றி அளித்திருக்கிறார்கள்” என பதிலளித்தார்.
அப்போது எதிர்க்கட்சி தலைவர் மு.க. ஸ்டாலின் பேசும்போது, ”2021ஆம் ஆண்டு சட்டப்பேரவைத் தேர்தலில் தி.மு.க. மிகப்பெரிய வெற்றி பெற்று ஆட்சி அமைக்கும். அப்போது நாங்கள் அளித்த வாக்குறுதிகளை நிச்சயம் நிறைவேற்றுவோம்”என்றார்.
அதற்கு முதலமைச்சர் எடப்பாடி பழனிசாமி பதில் அளிக்கையில்,” 2021 பொதுத் தேர்தல் பற்றி இப்போது ஏன் பேசுகிறீர்கள். ஆட்சியிலேயே இல்லாத நீங்கள் எப்படி கடனை தள்ளுபடி செய்வீர்கள். 2021 தேர்தலின்போது நீங்கள் வாக்குறுதி அளிக்கலாம். இப்போது நடைபெறும் ஆட்சி அ. தி.மு.க. ஆட்சி என பேசிக்கொண்டிருக்கும் போதே, தி.மு.க. உறுப்பினர் ஆஸ்டின் அமர்ந்து கொண்டே முதலமைச்சரை பேச விடாமல் குறுக்கீடு செய்தபடியே இருந்தார்.
இதனால் கோபம் அடைந்த முதலமைச்சர் எடப்பாடி பழனிசாமி, யார் பேசினாலும் தி.மு.க. உறுப்பினர் ஆஸ்டின் குறுக்கிட்டு பேசுவதையே வேலையாக இருக்கிறார் என ஆவேசத்துடன் தெரிவித்தார். இதனால் அதி.மு.க. – தி.மு.க. உறுப்பினர்கள் இடையே கடும் வாக்குவாதம் ஏற்பட்டு அவையில் கூச்சல் குழப்பம் எழுந்தது.
பேரவையைச் சீர்படுத்த பேசிய சபாநாயகர் தனபால், முதலமைச்சர் பேசும்போது குறுக்கிட்டு பேசுவது முறையல்ல. அதுவும் நீங்கள் உட்கார்ந்து கொண்டே பேசுகிறீர்கள். அனைத்து உறுப்பினர்களும் அமைதி காக்க வேண்டும். தி.மு.க. உறுப்பினர் ஆஸ்டின் இது போன்று தொடர்ந்து நடந்து கொண்டால் கடும் நடவடிக்கை எடுக்கப்படும். இது எனது இறுதி எச்சரிக்கையாகும்” என்றார்.
அப்போது துணை முதலமைச்சர் ஓ. பன்னீர்செல்வம், “ உறுப்பினர் ஆஸ்டினுக்கு சபாநாயகர் பலமுறை கடுமையான எச்சரிக்கைகளை தெரிவித்திருக்கிறார். இந்த முறை அவர் மீது நடவடிக்கை எடுக்க வேண்டும் ” என்று சபாநாயகருக்கு வேண்டுகோள் விடுத்தார்.
அதைத் தொடர்ந்து சபாநாயகர் தி.மு.க. உறுப்பினர் ஆஸ்டினை இன்று ஒரு நாள் சஸ்பெண்ட் செய்கிறேன். அவையில் இருந்து உறுப்பினர் ஆஸ்டினை வௌியேற்ற உத்தரவிடுகிறேன் என்றார்.
இதுதொடர்பாக பேசிய துரைமுருகன்," அவையில் உட்காந்துகொண்டு பேசுவதை ஏற்க முடியாது என்பதை நான் ஒப்புக்கொள்கிறேன். நீங்கள் எப்போதும் தாயுள்ளத்தோடு நடுநிலையாக நடந்துகொள்வீர்கள் எனபதை ஒப்புக்கொள்கிறோம். எனவே, ஆஸ்டின் மீதான நடவடிக்கைகளைத் திரும்பப் பெறக் கோருகிறேன்.
இதற்கு முதலமைச்சரும், அவை முன்னவரும் எதிர்க்க மாட்டார்கள் என நம்புகிறேன்" என்றார்.
இதையடுத்து துணை முதலமைச்சர் ஓ.பன்னீர்செல்வம்," ஆஸ்டின் பலமுறை இவ்வாறு நடந்துகொண்டதால் தான் இப்படி தண்டனை கொடுக்க வேண்டியதாகிவிட்டது" என்றார்.
முதலமைச்சரும், அவை முன்னவரும் கூறியதன் அடிப்படையில், ஆஸ்டின் மீதான இன்று ஒருநாள் அவையை விட்டு வெளியேற்றும் உத்தரவை திரும்பப் பெறுகிறேன் என்று சபாநாயகர் தனபால் தெரிவித்தார்.
இதையும் படிங்க : கொரோனா முன்னெச்சரிக்கை : கேரளா வாகனங்கள் சோதனைக்கு ஒத்துழைப்பதில்லையா?
