தலைமைச் செயலகத்தில் இன்று வரைவு வாக்காளர் பட்டியல் வெளியீடு தொடர்பாக அங்கீகரிக்கப்பட்ட கட்சிகளுடனான ஆலோசனைக் கூட்டம் நடைபெற்றது. தலைமைத் தேர்தல் அலுவலர் சத்யபிரதா சாகு தலைமையில் நடைபெற்ற இக்கூட்டத்தில் திமுக, அதிமுக, காங்கிரஸ், பாஜக, மார்க்சிஸ்ட் கம்யூனிஸ்ட், இந்திய கம்யூனிஸ்ட், தேமுதிக, பகுஜன் சமாஜ் உள்ளிட்ட 9 கட்சிகளின் பிரதிநிதிகள் கலந்து கொண்டனர்.
கூட்டத்தில் பங்கேற்ற பின் செய்தியாளர்களை சந்தித்த திமுக அமைப்புச் செயலாளர் ஆர்.எஸ்.பாரதி, ” வாக்காளர் பட்டியல் நேர்மையாகவும் நியாயமான முறையிலும் வெளியிடப்பட வேண்டும் என மூன்று மனுக்கள் அளித்துள்ளோம். கடந்த நாடாளுமன்றத் தேர்தலின் போது, கன்னியாகுமரி தொகுதியில் 40 ஆயிரம் வாக்காளர் பெயர்கள் நீக்கப்பட்டன. அதுபோல் இம்முறை நடந்துவிடக் கூடாது.
கரோனா காலத்தில் இறந்தவர்களின் பெயரை நீக்க என்னென்ன ஆவணங்கள் அளிக்க வேண்டும் எனவும் விவாதிக்கப்பட்டது. ஆன்லைன் மூலம் விண்ணப்பிப்பது ஏழைகளுக்கு உகந்தது அல்ல என்பதால், அதுகுறித்து நடவடிக்கை எடுக்கவும் வலியுறுத்தினோம். 80 வயதுக்கு மேலான முதியவர்கள் அஞ்சல் ஓட்டு போட அனுமதிப்பத்து குறித்தும் தலைமை தேர்தல் அலுவலருடன் ஆலோசனை நடத்தப்பட்டது.
தொடர்ந்து அதிமுக சார்பில் பங்கேற்ற பொள்ளாச்சி ஜெயராமன், ” கரோனா காரணமாக வீடு மாறியவர்களுக்கு முகவரி மாற்றம் செய்து புதிய வாக்காளர் அட்டையை விரைவில் வழங்க வேண்டும், வெளிநாடுகளில் தங்கியுள்ளவர்கள் திருத்தம் மேற்கொள்ளும் வகையில் ஆன்லைன் மூலம் விண்ணப்பிக்க வசதிகள் ஏற்படுத்தித்தர தர வேண்டும் என்று கோரிக்கை வைத்துள்ளோம். வாக்காளர்களின் வசதிக்காக வாக்குச்சாவடி மையங்களின் எண்ணிக்கையை அதிகரிக்க வேண்டும் என்றும் கேட்டுள்ளோம் “ என்றார்.
வரைவு வாக்காளர் பட்டியல் வரும் 16 ஆம் தேதி வெளியிடப்பட்டு, அதிலிருந்து டிசம்பர் 15ஆம் தேதிக்குள், வாக்காளர் பட்டியலில் பெயர் சேர்க்க விரும்பும் தகுதியுடைய வாக்காளர்கள், பெயர் நீக்கம், திருத்தம், இடமாற்றம் விரும்புவோர் அதற்கான விண்ணப்பங்களை அளிக்க வேண்டும். இது தொடர்பான விண்ணப்பங்கள் அனைத்தும் வரும் ஜனவரி 5ஆம் தேதி இறுதி செய்யப்பட்டு ஜனவரி 20ஆம் தேதி இறுதி வாக்காளர் பட்டியல் வெளியிடப்படும்.
இதையும் படிங்க: அரசியல் கட்சி பிரதிநிதிகளுடன் சத்யபிரதா சாகு ஆலோசனை!
