வடசென்னை வடக்கு மாவட்ட அதிமுக சார்பில் சென்னை காவல் துறைக்கு, 500 சிசிடிவி கேமராக்கள் வழங்கும் நிகழ்ச்சி தண்டையார்பேட்டையில் உள்ள தனியார் திருமண மண்டபத்தில் நடைபெற்றது. இந்த நிகழ்ச்சியில் சென்னை மாநகர காவல் ஆணையர் ஏ.கே. விஸ்வநாதன், வடக்கு மண்டல கூடுதல் காவல் ஆணையர் தினகரன், காவல் துறை உயரதிகாரிகள் மற்றும் கல்லூரி மாணவர்கள் கலந்துகொண்டனர்.
நிகழ்ச்சியில் சென்னை மாநகர காவல் ஆணையர் ஏ.கே. விஸ்வநாதன் பேசியபோது, “இந்த கண்காணிப்பு கேமராக்கள் வருவதற்கு முன்பு கடுமையான மன அழுத்தம், உடல் சோர்வு எங்களுக்கு ஏற்படும். ஆனால், இவை அமைக்கப்பட்ட பின்பு, எங்களது பணிகள் சற்று வித்தியாசமாக மாறியுள்ளது. திருட்டு நடந்தால் அதை கண்டுபிடிப்பது மிகக் கடினமாக ஒரு காலத்தில் இருந்தது. 2010க்குப் பிறகு தங்கத்தின் விலை மிக அதிகமானதால் செயின் பறிப்பு நிகழ்வுகள் அதிகமாகின. ஆனால், கேமராக்கள் அமைக்கப்பட்ட பின்பு 50% செயின் பறிப்பு குற்றங்கள் குறைந்துள்ளன. அப்படியே நடந்தாலும் அவர்களை இரண்டு, மூன்று நாட்களில் பிடித்து விடுகிறோம்.
தமிழ்நாடு முதலமைச்சர் என்னிடம், இத்திட்டத்தை பொதுமக்கள் உதவியோடு செயல்படுத்துங்கள் என அறிவுரை வழங்கினார். அதன்படி சென்னை மாநகர மக்கள் தாராளமாக உதவி செய்ததால், தற்போது 70 விழுக்காடு அளவிற்கு, கண்காணிப்பு கேமராக்கள் பொருத்தப்பட்டுள்ளன. எங்களது இலக்கு 3 லட்சம் கேமராக்கள்.
அதேபோல், காவலன் செயலி திட்டமும் வெற்றிகரமாக செயல்பட்டுக் கொண்டிருக்கிறது. அனைத்துக் காவலர்களும் பொதுமக்களிடம் நல்ல விழிப்புணர்வை ஏற்படுத்தியதால், 10 லட்சம் பேர் இந்த செயலியை பதிவிறக்கம் செய்துள்ளனர் “ என்றார்.
இதையும் படிங்க: 4 கிலோ தங்கக் கட்டிகளை திருடிச் சென்ற ஈரானிய கொள்ளையர்கள்!
