சென்னை மெட்ரோ ரயிலின் முதல் திட்டம், வண்ணாரப்பேட்டை முதல் விமான நிலையம் வரையிலான 23 கி.மீ. தூரத்திலும், சென்ட்ரல் முதல் பரங்கிமலை வரையிலான 21 கி.மீ. தூரத்திலும் என இரண்டு வழித்தடங்களில் இயக்கப்பட்டு வருகிறது. முதல் வழித்தடத்தில் கூடுதலாக வண்ணாரப்பேட்டை முதல் விம்கோ நகர் வரையிலான மெட்ரோ ரயில் முதற்கட்ட திட்டத்தின் விரிவாக்க பணிகள் நடைபெற்று வருகிறது. 8 ரயில் நிலையங்கள் கொண்ட இந்த வழித்தடத்தில் இரண்டு ரயில் நிலையங்கள் சுரங்கப்பாதையிலும், மற்றவை உயர்மட்ட பாலத்தின் மீதும் அமைந்திருக்கும்.
இந்நிலையில், 9.051 கி.மீ. தொலைவு கொண்ட வண்ணாரப்பேட்டை-விம்கோ நகர் மெட்ரோ ரயில் சேவையின் முதற்கட்ட விரிவாக்க திட்டத்தில், இன்று டீசல் எஞ்சின் மூலம் அதிகாரிகள் சோதனை ஓட்டம் நடத்தினர். வெற்றிகரமாக இந்த சோதனை ஓட்டம் நடைபெற்றதாக அதிகாரிகள் தெரிவித்துள்ளனர்.
இதன் மூலம் வடசென்னை பகுதி, நகரின் வணிகம் நடக்கும் மையப்பகுதியுடன் இணைக்கப்படும். மேலும் அப்பகுதி மக்கள் குறைந்த நேரத்தில் அதிக தூரம் சென்று வர முடியும். இதனால் வேலைவாய்ப்புகள் உள்ளிட்ட பல்வேறு நன்மைகள் விளையும்.
தற்போது இந்த வழித்தடத்தில் தண்டவாளம், மின் கம்பங்கள் பதித்து மின் வழித்தடம், சிக்னல்கள், சுரங்க வழித்தடத்தில் காற்று செல்வதற்கான வசதிகள், நடைபாதையில் இருந்து யாரும் ரயில் தண்டவாளத்துக்குள் செல்லாத வண்ணம் நடைபாதை பாதுகாப்பு கண்ணாடிகள், டிக்கெட் வசூலிக்கும் தானியங்கி கதவுகள் ஆகியவற்றை பொருத்தும் பணிகள் மூழுவீச்சில் நடந்து வருகின்றன.
இதனை சென்னை மெட்ரோ ரயில் பணிகளில் ஒரு முக்கிய மைல்கல்லாகப் பார்ப்பதாக கூறும் அதிகாரிகள், ஜனவரி இறுதிக்குள் வண்ணாரப்பேட்டை முதல் விம்கோ நகர் வரையிலான வழித்தடம், பொதுமக்கள் பயன்பாட்டுக்கு திறக்கப்படும் எனவும் தெரிவித்துள்ளனர்.
இதையும் படிங்க: இரவு நேரத்தில் சுற்றித் திரியும் காட்டுயானை - பொதுமக்கள் பீதி!
