சவூதி அரேபிய தூதரகத்தில் நடந்த கொலை: உயிர்பெற்றது வழக்கு!

சவூதி அரேபிய செய்தியாளர் ஜமால் கஷோகி, இஸ்தான்புல்லில் உள்ள அந்த நாட்டுத் தூதரகத்தில் 2018ஆம் ஆண்டு படுகொலை செய்யப்பட்டது தொடர்பான வழக்கின் விசாரணை, அந்த நகர நீதிமன்றத்தில் தொடங்கியுள்ளது.

இஸ்தான்புல் (துருக்கி): துருக்கியிலுள்ள சவூதி அரேபிய தூதரகத்தில் செய்தியாளர் ஜமால் கஷோகி படுகொலை செய்யப்பட்டது தொடர்பான வழக்கின் விசாரணை ஜூலை 3ஆம் தேதி தொடங்கியுள்ளது.

இந்த வழக்கில் சவூதி அரேபிய பட்டத்து இளவரசர் முகமது பின் சல்மானின் இரண்டு உதவியாளர்கள் உள்ளிட்ட 20 சவூதி அரேபியர்கள் மீது குற்றச்சாட்டு பதிவு செய்யப்பட்டுள்ளது. அவர்கள் அனைவருமே தங்கள் சொந்த நாட்டுக்குச் சென்றுவிட்ட நிலையில், அவர்கள் இல்லாமல் இந்த வழக்கு விசாரணை தொடங்கப்பட்டுள்ளது.

விசாரணையின் முதல் நாளில், கஷோகியை மணக்கவிருந்த ஹாடிஸ் செங்கிஸ் நீதிமன்றத்தில் ஆஜராகி சாட்சியம் அளித்தார். கஷோகியை வஞ்சகமாக தூதரகம் வரவழைத்து, படுகொலை செய்த கொடூரர்கள் அனைவரையும் சட்டத்தின் முன் நிறுத்தப்பட வேண்டும் என்று அப்போது அவர் கூறினார்.

சவூதி அரேபியாவைச் சேர்ந்த செய்தியாளர் ஜமால் கஷோகி, சர்ச்சைகள் காரணமாக சொந்த நாட்டிலிருந்து தப்பி அமெரிக்காவில் வசித்து வந்தார். அங்கு வெளியாகும் ‘வாஷிங்டன் போஸ்ட்’ நாளிதழில் கட்டுரைகள் எழுதி வந்த அவர், சவூதி அரசின் கொள்கைகளுக்கு எதிராகவும், பட்டத்து இளவரசருக்கு எதிராகவும் கருத்துகளைத் தெரிவித்து வந்தார்.