தென்காசி மாவட்டம் சிவகாமிபுரம், அருணாபேரி, சங்கரன்கோவில், செங்கோட்டை உள்ளிட்டப் பகுதிகளில் ஆயிரக்கணக்கான ஏக்கரில் விவசாயிகள் மல்லிகை, பிச்சி, கனகாம்பரம், கேந்தி, ரோஸ் , சம்பங்கி, அரளிப் பூ உள்ளிட்ட பூக்களை விவசாயம் செய்து வருகின்றனர்.
கரோனா தொற்றுப் பரவி வருவதால், நாடு முழுவதும் ஊரடங்கு உத்தரவு படிப்படியாக நீட்டிக்கப்பட்ட நிலையில் சிறு, குறு தொழில்கள் முடங்கி காணப்படுகிறது. இந்நிலையில் தென்காசி மாவட்டத்தில் உள்ள பூக்களின் சந்தைகளும் மூடப்பட்டுள்ளதால், விவசாயம் பெருமளவு பாதிக்கப்பட்டுள்ளது.
தற்போது வழிபாட்டுத்தலங்கள் தொடர்ந்து மூடப்பட்டுள்ளதால் பூக்கள், மாலைகள் வியாபாரமும் இல்லாமல் விவசாயிகளும்,வியாபாரிகளும் பெருமளவு பாதிக்கப்பட்டுள்ளனர்.
தென்காசி சுவாமி சன்னதி அருகில் பஜாரில் இயங்கி வரும் பூச்சந்தையில், பூ வாங்க பொதுமக்கள் வருகையில்லாமல் வெறிச்சோடி காணப்படுகிறது.
தற்போது கிலோ வாரியாக மல்லிகை 125 ரூபாய்க்கும், பிச்சிப்பூ 250 ரூபாய்க்கும், அரளிப்பூ 80 ரூபாய்க்கும், கேந்தி பூ 60 ரூபாய்க்கும், சம்பங்கிப்பூ 60 ரூபாய்க்கும், அரளிப்பூ 80 ரூபாய்க்கும், நாட்டு ரோஜா 60 ரூபாய்க்கும், கனகாம்பரம் பூ 200 ரூபாய்க்கும், கோழிப்பூ 40 ரூபாய்க்கும் விற்பனையாகிறது.
இதனால் விவசாயிகள், வியாபாரிகள் பெருமளவு பாதிப்புக்கு உள்ளாகியுள்ளனர். பூ மாலைகள் வியாபாரமும் இல்லாததால், வியாபாரிகள் வேதனையடைந்துள்ளனர்.
