திருவாரூர் மாவட்டம் முழுவதும் இந்த ஆண்டு சுமார் 20 ஆயிரம் ஏக்கர் பரப்பளவில் பருத்தி சாகுபடியில் விவசாயிகள் ஈடுபட்டுள்ளனர். தற்போது பருத்தியை அறுவடை செய்யும் பணி நடைபெற்று வருகிறது. அரசு சார்பில் கிலோ ஒன்றுக்கு 52 முதல் 55 ரூபாய் வரை பருத்தி விலை நிர்ணயம் செய்யப்பட்டுள்ளது.
இந்நிலையில், விவசாயிகளிடமிருந்து இந்திய பருத்திக் கழகம் முழுமையாக பருத்தியை கொள்முதல் செய்யவில்லை என குற்றச்சாட்டு எழுந்துள்ளது. இதனால், தனியார் வியாபாரிகளிடம் விற்பனை செய்யும் போது கிலோ 30 ரூபாய்க்கு மட்டுமே விலை கிடைப்பதாக விவசாயிகள் குற்றஞ்சாட்டுகின்றனர்.
இதனிடையே, விவசாயிகளிடமிருந்து இந்திய பருத்திக் கழகம் முழுமையாக பருத்தியை கொள்முதல் செய்ய வலியுறுத்தி மாவட்ட ஆட்சியர் அலுவலகம் முன்பு தமிழ்நாடு விவசாய சங்கம் சார்பில் ஆர்ப்பாட்டம் நடைபெற்றது. இதில், நாகப்பட்டினம் மக்களவை உறுப்பினர் செல்வராஜ் தலைமையில் 50க்கும் மேற்பட்ட விவசாயிகள் அறுவடை செய்யப்பட்ட பருத்தியுடன் வந்து கோஷங்களை எழுப்பி ஆர்ப்பாட்டத்தில் ஈடுபட்டனர்.
அதில், பாதிக்கப்பட்ட விவசாயிகளுக்கு ஏக்கருக்கு 30 ஆயிரம் நிவாரணம் வழங்க வேண்டும் என வலியுறுத்தப்பட்டது.
இதையும் படிங்க: மதுரையில் கரோனாவால் இன்று ஒரே நாளில் 8 பேர் பலி!
