தஞ்சாவூர் மாவட்டம் கும்பகோணத்தில் நகராட்சி காய்கறி மொத்தம் மற்றும் சில்லறை வணிக வளாகம் தாராசுரம் பகுதியில் உள்ளது. கடந்த சனிக்கிழமை இங்குள்ள தேங்காய் வணிகர் ஒருவருக்கும், இங்கிருந்து காய்கறி வாங்கி வெளியே சில்லறை வணிகம் செய்யும் இரு நபர்களுக்கும் தொற்று உறுதியானது. இதையடுத்து காய்கறி அங்காடி உடனடியாக மூடப்பட்டதுடன் அதன் அருகேயுள்ள பிற வணிக நிறுவனங்களும் மூடப்பட்டன.
மேலும், அங்குள்ள வணிகர்கள், கடை ஊழியர்கள், சுமை தூக்குவோர் என 300 நபர்களுக்கு கடந்த இரு நாள்களாக கரோனா தொற்று குறித்த பரிசோதனை மேற்கொள்ளப்பட்டது. இதில் முதல்கட்டமாக 50 பேருக்காண முதற்கட்ட பரிசோதனை முடிவுகள் நேற்று காலை வெளியானதில், 20 பேருக்கு தொற்று உறுதியானது.
இதனையடுத்து நேற்று காய்கறி அங்காடியுடன் தொடர்புடைய மேலும் 300 நபர்களுக்காண மருத்துவ பரிசோதனை சிவகுருநாதன் பள்ளியில் நடைபெற்றது. இதனையடுத்து மாவட்ட ஆட்சியர் கோவிந்தராவ், முதலில் காய்கறி அங்காடி பகுதியில் ஆய்வு செய்தார். பின்னர் அருகே இரு அரசு மதுபான கடைகள் செயல்படுவதாக தெரிவித்ததையடுத்து அதனை ஆய்வு செய்து அவற்றை உடனடியாக மூட உத்தரவிட்டார்.
பின்னர் சிவகுருநாதன் பள்ளியில் நடைபெறும் மருத்துவ பரிசோதனைகளை ஆய்வு செய்தார். இந்த ஆய்வின்போது மாவட்ட ஆட்சியருடன், சுகாதாரப்பணிகள் இணை இயக்குனர், கோட்டாட்சியர், நகராட்சி ஆணையர் லட்சுமி, காவல் துறை துணை கண்காணிப்பாளர் பாலகிருஷ்ணன், வட்டாட்சியர் பாலசுப்பிரமணியன் உள்பட பலர் உடனிருந்தனர்
இதற்கிடையே செய்தியாளர்களை சந்தித்த மாவட்ட ஆட்சியர் கோவிந்தராவ், "தஞ்சை மாவட்டம் முழுவதும் கரோனாவினால் இதுவரை 709 பேர் பாதிக்கப்பட்டுள்ளனர். நகரில் மட்டும் 129 பேர் பாதிக்கப்பட்டுள்ளனர். மாவட்டத்தில் இதுவரை 430 பேர் சிகிச்சைப் பெற்று நலமுடன் வீடு திரும்பியுள்ளனர்.
நேற்று காலை வரை கரோனாவால் 10 பேர் உயிரிழந்துள்ளனர். எஞ்சிய 279 பேர் தொடர் சிகிச்சையில் உள்ளனர். நோய் தொற்று ஏற்படாமல் தடுக்க அனைவரும் முகக்கவசம், தகுந்த இடைவெளியினை கடைப்பிடிக்கவும், அடிக்கடி கை கழுவும் பழக்கங்களை தொடர்ந்து நடைமுறைப்படுத்த வேண்டும்" என்றார்.
