பாட்னா: தமிழ்நாட்டில், பீகார் உள்ளிட்ட வடமாநிலங்களைச் சேர்ந்த தொழிலாளர்கள் மீது தாக்குதல் நடத்துவதாக வீடியோக்கள் சமூக வலைதளங்களில் வெளியாகி வேகமாக பரவியது. இந்த சம்பவம் நாடு முழுவதும் பெரும் பரபரப்பை ஏற்படுத்தியது. பல்வேறு அரசியல் தலைவர்கள் இதற்கு கடும் கண்டனம் தெரிவித்தனர்.
சமூக வலைதளங்களில் வெளியான வீடியோ போலியானது என தமிழக காவல் துறை தரப்பில் அறிக்கை வெளியிடப்பட்டது. மேலும் கட்டுமானம் உள்ளிட்ட பல்வேறு தொழில்களில் ஈடுபட்டு வரும் வட மாநில தொழிலாளர்களின் பாதுகாப்பை காவல் துறை அதிகாரிகள் உறுதிபடுத்தினர். மேலும் வடமாநில தொழிலாளர்கள் பாதுகாப்பு அச்சுறுத்தல் இருப்பதாக கருதினால் புகார் அளிக்கலாம் என காவல் துறை தரப்பில் புகார் எண்கள் வெளியிடப்பட்டன.
மேலும் மாவட்டந்தோறும் உள்ள தொழில் துறை நிறுவனங்களில் பணியாற்றும் வடமாநில தொழிலாளர்களை, நேரில் சென்று சந்தித்த மாவட்ட ஆட்சியர் மற்றும் காவல் கண்காணிப்பாளர் உள்ளிட்டோர், அவர்களுக்கு புரியும் வகையில் இந்தி மொழியில் அறிவிப்புகளை வெளியிட்டனர். மேலும் வடமாநில தொழிலாளர்கள் பாதுகப்பு குறித்து வதந்தி பரப்பினால் கடும் நடவடிக்கை எடுக்கப்படும் என போலீசார் தெரிவித்தனர்.
மறுபுறம் தமிழகத்தில் வடமாநில தொழிலாளர்கள் தாக்கப்படுவதாக பீகார் சட்டமன்றத்தில் எதிரொலித்த நிலையில், நேரில் சென்று ஆய்வு செய்யுமாறு பீகார் முதலமைச்சர் நிதிஷ் குமார் சிறப்பு குழுவை தமிழகத்திற்கு அனுப்பி வைத்தார். தமிழகம் வந்த சிறப்புக் குழு பீகார் உள்ளிட்ட வடமாநிலங்களைச் சேர்ந்த தொழிலாளர்களை நேரில் சந்தித்து பாதுகாப்பு அச்சுறுத்தல் குறித்து கேட்டறிந்தது.
மேலும் தமிழகத்தில் வடமாநில தொழிலாளர்கள் பாதுகாப்புடன் இருப்பதாக குழு அறிக்கை அளித்தது. இதனிடையே போலியாக வதந்தி பரப்பியவர்களை தேடி தமிழகத்தில் இருந்து தனிப்படை போலீசார் பீகார், டெல்லிக்கு சென்றனர். வட மாநில தொழிலாளர்கள் தாக்குதல் தொடர்பாக போலி வீடியோ பரப்பியதாக பீகாரின் ஜமுன் மாவட்டத்தைச் சேர்ந்த அமன் குமாரை தமிழக போலீஸார் கைது செய்தனர்.
இந்த விவகாரம் தொடர்பாக பொருளாதார குற்றப்பிரிவு போலீசார், பீகார் போலீசார் தொடர்ந்து விசாரணை நடத்தி வருகின்றனர். இந்நிலையில் போலி வீடியோ வழக்கு தொடர்பாக 3 பேரை கைது செய்து உள்ளதாகவும் 42 பேருக்கு நோட்டீஸ் அனுப்பி உள்ளதாகவும் பீகார் போலீசார் தெரிவித்து உள்ளனர்.
இதுவரை அமன் குமார், ராகேஷ் ரஞ்சன், உமேஷ் மகாடோ ஆகியோர் கைது செய்யப்பட்டு உள்ளதாகவும், சமூக வலைதளங்களில் வீடியோ பரபரப்பிய 42 பேருக்கு நோட்டீஸ் அனுப்பட்டு உள்ளதாகவும் அதில் இருவரை உடனடியாக கைது செய்ய நீதிமன்றத்தை நாடி உள்ளதாகவும் போலீசார் தெரிவித்து உள்ளனர்.
இதில் ஜக்கன்பூர், பெங்காலி காலனி பகுதியில், இரு நண்பர்கள் உதவியுடன் வாடகை வீடு எடுத்து தமிழகத்தில் வடமாநில தொழிலாளர்கள் தாக்குவது போன்று போலி வீடியோக்களை எடுத்ததாக ராகேஷ் ரஞ்சன் குமார் தெரிவித்ததாக பீகார் பொருளாதார குற்றப்பிரிவு போலீசார் தெரிவித்து உள்ளனர். மேலும் இந்த சம்பவம் தொடர்பாக 10 பேர் கொண்ட குழு தொடர்ந்து விசாரணை நடத்தி வருகிறது.
இதையும் படிங்க: தெலங்கானா முதல்வர் கேசிஆர் மகள் கவிதா அமலாக்கத்துறை விசாரணைக்கு ஆஜர்!
