ஹைதராபாத்: அடுத்த 24 மணி நேரத்திற்குள், அமெரிக்க அதிபர் டொனால்ட் ட்ரம்ப் தனது முதல் அதிகாரப்பூர்வ இந்திய பயணத்தை பிப்ரவரி 24-25 தேதிகளில் தனது விமானமான 'ஏர் ஃபோர்ஸ் ஒன்' மூலம் மேற்கொள்ளவிருக்கிறார். பிப்ரவரி 24ஆம் தேதி குஜராத்தில் தரையிறங்கிய பின்னர் மெலேனியா ட்ரம்புடன் சேர்ந்து, அவர் தனது 1.5 மில்லியன் டாலர் மதிப்புடைய ஏழு இருக்கைகள் கொண்ட சொகுசு கார் 'தி பீஸ்ட்'-ல் நேரடியாக அகமதாபாத்தின் மொடீரா மைதானத்திற்கு செல்வார். 'ஏர் ஃபோர்ஸ் ஒன்' மற்றும் 'தி பீஸ்ட்' இரண்டும் தனித்துவமானவை, உலகத்தரம் வாய்ந்தவை. அவற்றைப் பற்றி அறிந்து கொள்வோம்...
ஏர் ஃபோர்ஸ் ஒன்
காற்றில் பறக்கும் வெள்ளை மாளிகை என்றழைக்கப்படும் ஏர் ஃபோர்ஸ் ஒன் விமானம், அமெரிக்க ஜனாதிபதியை உலகின் எந்த மூலைக்கும் அழைத்துச் செல்கிறது.
அமெரிக்க அதிபர் மற்றும் அமெரிக்க கலாசாரத்தின் அடையாளங்களில் ஒன்றாகக் கருதப்படும் ஏர் ஃபோர்ஸ் ஒன், அது எங்கு பறந்தாலும் அதன் மறுக்க முடியாத இருப்பைக் குறிக்கிறது. "யுனைடெட் ஸ்டேட்ஸ் ஆஃப் அமெரிக்கா", அமெரிக்கக் கொடி மற்றும் அமெரிக்க ஜனாதிபதியின் முத்திரை ஆகியவற்றால் அலங்கரிக்கப்பட்டிருக்கும் அந்த விமானம், அதிபர் எங்கு வேண்டுமானாலும் எப்போது வேண்டுமானாலும் பயணம் செல்ல எப்போதும் தயாராக இருக்கும்.
ஏர் ஃபோர்ஸ் ஒன் நடுவானில் எரிபொருள் நிரப்பும் திறன் கொண்டது. மேலும் மின்காந்த அலைகளை தாங்கும் வகையில் விமானத்தில் மின்னணுவியல் உள்ளது. உள்ளே அமைக்கப்பட்டிருக்கும் மேம்பட்ட பாதுகாப்பான தகவல் தொடர்பு உபகரணங்கள், அமெரிக்கா மீது தாக்குதல் நடந்தால் விமானம் மொபைல் கட்டளை மையமாக செயல்படும் வகையில் அமைக்கப்பட்டிருக்கும்.
ஏர் ஃபோர்ஸ் ஒன் மூன்று நிலைகளில் 4,000 சதுர அடி அளவைக் கொண்டுள்ளது, இதில் ஒரு அதிபருக்கான தனி அறை, ஒரு பெரிய அலுவலக அறை, மாநாட்டு அறை மற்றும் அதிபருடன் வருபவர்களுக்கான அறைகள் உள்ளன. இது தவிர, ஒரு தனி மருத்துவருடன் கூடிய மருத்துவ அறையும் உள்ளது. இந்த விமானத்தில் இரண்டு உணவகங்கள் உள்ளன. அவை ஒரே நேரத்தில் 100 பேருக்கு உணவளிக்க முடியும்.
தொலைதூர இடங்களுக்கு பயணிக்கும்போது தேவைபட்டால் அதிபருக்கு சேவைகளை வழங்குவதற்காக பல சரக்கு விமானங்கள் இந்த விமானத்திற்கு முன் பறந்து செல்லும்.
வெள்ளை மாளிகை இராணுவ அலுவலகத்தின் ஒரு பகுதியாக இருக்கும் அதிபரின் விமானப்படை குழு, ஏர் ஃபோர்ஸ் ஒன்-ஐ பராமரித்து இயக்குகிறது.
தி பீஸ்ட்
டொனால்ட் ட்ரம்பின் அரசு வாகனம், அதிபரை பாதுகாப்பாக வைத்திருக்க பல்வேறு பாதுகாப்பு வழிமுறைகளுடன் பொருத்தப்பட்ட ஒரு தனித்துவமான காடிலாக், செப்டம்பர் 24, 2018 அன்று அறிமுகப்படுத்தப்பட்டது. இந்த 1.5 மில்லியன் டாலர் சமீபத்திய சொகுசு கார், பராக் ஒபாமா பயன்படுத்திய முந்தைய காடிலாக் ஒன் பல ஆண்டுகளுக்கு முன்பு அயர்லாந்தில் உள்ள அமெரிக்க தூதரகத்தில் இருந்து வெளியே வந்த போது சிறிய வளைவில் பழுதாகி நின்றதால், அதற்கு பதிலாக மாற்றப்பட்டது.
தி பீஸ்ட்டில் குண்டு துளைக்காத ஜன்னல்கள் மற்றும் கதவுகள், பஞ்சராகாத டயர்கள் மற்றும் ஒரு செயற்கைக்கோள் தொலைபேசி ஆகியவற்றைக் கொண்டுள்ளது. ரசாயன தாக்குதலில் இருந்து உள்ளே இருப்பவர்களைப் பாதுகாக்க கண்ணாடி மற்றும் பாலிகார்பனேட்டுடன் அமைக்கப்பட்ட ஐந்து அடுக்குகளால் ஆன ஜன்னல்கள் உள்ளது. இரும்பு, அலுமினியம், டைட்டானியம் மற்றும் பீங்கான் ஆகியவற்றால் ஆன கதவின் உட்புறம் வெடிகுண்டு தாக்குதலை சமாளிக்கும் வகையில் அமைந்துள்ளது.
பம்ப்-ஆக்சன் ஷாட்கன்கள், கண்ணீர்ப்புகை குண்டு, ஏவுகணைகள், புகை திரை அமைப்பு மற்றும் தீயணைப்பு அமைப்பு போன்ற பாதுகாப்பு உபகரணங்கள் தி பீஸ்ட்-ல் பொருத்தப்பட்டுள்ளது
மேலும், இந்த வாகனம் அதிபரின் ரத்த வகை, ஆக்ஸிஜன் ஆகியவற்றை எடுத்துச் செல்கிறது. இரவு நேரத்தில் காரின் விளக்குகளை ஆன் செய்யாமல் காரை ஓட்டும் வகையில் நைட்-விஷன் சிறப்பு அம்சம் இருக்கிறது
அதிபர் ட்ரம்பிற்கு தனித்துவமாக காரில் சில சிறப்பு அம்சங்கள் உள்ளன. காரின் பின்புற பகுதியில் துணை அதிபர் மற்றும் பென்டகனை நேரடியாக தொடர்புகொள்ளும் செயற்கைக்கோள் தொலைபேசியுடன் ஒரு இருக்கை வசதி செய்யப்பட்டுள்ளது. தவிர, ஓட்டுநருக்கும் பயணிகளுக்கும் இடையே ஒரு கண்ணாடி தடுப்பு உள்ளது. அதற்கான ஸ்விட்ச்சை டிரம்ப் தன் கட்டுப்பாட்டில் மட்டுமே வைத்திருப்பார்.
அமெரிக்க உளவுத்துறையால் பயிற்சியளிக்கப்பட்ட ஒரு ஓட்டுநர் பீஸ்ட்-டை ஓட்டுகிறார். மிகவும் சவாலான சூழ்நிலைகளிலும் திறமையாகச் செயல்பட்டு தப்புவது குறித்து அவருக்கு பயிற்சியளிக்கப்பட்டுள்ளது.
