உத்தரப் பிரதேசம் மாநிலம் அயோத்தியில் சர்ச்சைக்குரிய இடத்தில் ராமர் கோயில் கட்ட உச்ச நீதிமன்றம் அனுமதி வழங்கியது. இந்தத் தீர்ப்பை ஏற்று புதிய ராமர் கோயிலுக்கு ராம் ஜென்ம பூமி தீர்த்த ஷேத்திரா என்ற அறங்காவல் அமைப்பு ஒன்றை மத்திய அரசு ஏற்படுத்தியுள்ளது. கோயில் கட்டுமான பணிகள், நிதி, நிர்வாகம் ஆகியவற்றை இந்த அறங்காவல் குழு மேற்கொள்கிறது. அதன்படி, புதிய கோயில் கட்டுவதற்காக நிதி திரட்டும் பணியையும் இந்த குழு மேற்கொண்டு வருகிறது.
கடந்த மாதம் வரை ரூ. 41 கோடிக்கும் அதிகமாக நிதி வசூலாகியுள்ளதாக இக்குழு தெரிவித்தது. இந்நிலையில், இந்த அறக்கட்டளையின் வங்கிக் கணக்கிலிருந்து போலி காசோலை மூலம் பணம் எடுக்கப்பட்டுள்ளது கண்டறியப்பட்டுள்ளது. இதில் சுமாராக 6 லட்சம் ரூபாய் வரை மோசடி நடந்திருக்கலாம் எனக் கூறப்படுகிறது.
முதலில் லக்னோவில் உள்ள இரண்டு வங்கிகளில் போலி காசோலையில் பணம் எடுக்கப்பட்டுள்ள நிலையில், மோசடி செய்த நபர் மூன்றாவதாக பாங்க் ஆஃப் பரோடா கிளையில் 9 லட்சத்து 86 ஆயிரம் ரூபாய் எடுக்க முயன்றுள்ளார். இந்த முறை போலி காசோலை மோசடி வெளிச்சத்துக்கு வந்தது.
இந்த காசோலை மோசடியில் ஈடுபட்டவர் மூன்றாவது முறையாக பணத்தை எடுக்க முயன்றபோது, ஸ்ரீராம ஜென்ம பூமி தீர்த்த க்ஷேத்ரா பொதுச் செயலாளர் சம்பத் ராய்க்கு வங்கி மேலாளர் தொடர்பு கொண்டுள்ளார். அப்போது, காசோலையைத் திரும்ப பெறுவது குறித்து தகவல் கிடைத்ததாகக் கூறப்படுகிறது. தற்போது, மோசடி செய்தவர் மீது அயோத்தி கோத்வாலி காவல் நிலையத்தில் வழக்குப்பதிவு செய்யப்பட்டு விசாரணை மேற்கொள்ளப்பட்டு வருகிறது.
இந்த விசாரணையில் கடந்த செப்டம்பர் 1ஆம் தேதி வங்கிலிருந்து முதல் முறையாக 2.5 லட்சம் ரூபாய் எடுக்கப்பட்டுள்ளதும், பின்னர் இரண்டு நாள்கள் இடைவெளியில் 3.5 லட்சம் ரூபாய் எடுக்கப்பட்டுள்ளதும் தெரிய வந்ததாக காவல் துறையினர் தெரிவித்தனர்.
இதையும் படிங்க:அயோத்தியில் ராமர் கோயில் கட்ட இதுவரை ரூ. 41 கோடி நிதி
