கோவிட்-19 அச்சுறுத்தலை காரணம் காட்டி குளிர்கால கூட்டத்தொடரை மத்திய அரசு ரத்து செய்துள்ளதாக நாடாளுமன்ற விவகார அமைச்சர் பிரல்ஹாத் ஜோஷி அண்மையில் தெரிவித்திருந்தார்.
இதனை விமர்சித்து சிவசேனா கட்சியின் அதிகாரப்பூர்வ நாளிதழ் சாம்னா, “ பூட்டிக்கிடப்பதற்கு ஏன் புதிய நாடாளுமன்ற கட்டடம் கட்டப்படுகிறது ?” என்ற தலைப்பில் தலையங்கம் ஒன்றை வெளியிட்டுள்ளது.
அதில், “கோவிட் -19 பரவல் அதிகரித்துவரும் நிலையில், முன்னெச்சரிக்கை நடவடிக்கையாக மகாராஷ்டிரா மாநில சட்டப்பேரவையின் குளிர்கால கூட்டத்தொடர் இரண்டு நாள்களாக குறைக்கப்பட்டது. இந்த அறிவிப்புக்கு மகாராஷ்டிரா பாஜகவினர் கடும் கண்டனம் தெரிவித்துவருகின்றனர்.
ஆனால், குளிர்கால கூட்டத்தொடரை மத்திய பாஜக அரசு முற்றும் முழுதாக ரத்துசெய்வதாக அறிவித்துள்ளது. இந்த ஜனநாயகப் படுகொலை குறித்து மகாராஷ்டிரா பாஜகவினர் வாய் திறக்கவில்லை. ஜனநாயகம் குறித்த பாஜகவினரின் கருத்துக்கள் அவர்களின் வசதிக்கு ஏற்ப மாறும்போல. நாடாளுமன்ற கூட்டத்தொடரை ரத்து செய்த பாஜகவினர்தான் மகாராஷ்டிராவில் கோயில்களை மீண்டும் திறக்க வேண்டுமென போராடினர். இதனை ஒரு வகையான பாசாங்கு என்றுதான் சொல்ல வேண்டும்.
குளிர்கால கூட்டத்தொடர் தொடர்பாக அனைத்து கட்சிகளிடமும் கலந்துரையாடியதன் அடிப்படையில்தான், இந்த முடிவு எடுக்கப்பட்டுள்ளதாக மத்திய நாடாளுமன்ற விவகார அமைச்சர் பிரல்ஹாத் ஜோஷி தெரிவித்திருக்கிறார். அந்த கூட்டம் எங்கு நடத்தப்பட்டது, யாரெல்லாம் அதில் பங்குகொண்டனர் என்ற கேள்விகளுக்கு பதிலளிக்க முடியுமா ?
புதிய வேளாண் சட்டங்களுக்கு எதிரான விவசாயிகளின் போராட்டம், சீனாவுடனான எல்லை சிக்கல், வீழ்ச்சியடைந்துள்ள நாட்டின் பொருளாதாரம் உள்ளிட்ட முக்கிய பிரச்னைகள் குறித்த விவாதத்தைத் தவிர்க்க விரும்புகிறது. இதன் காரணமாக நாடாளுமன்ற கூட்டத்தொடரை ரத்து செய்துள்ளது. இது என்ன வகை ஜனநாயக நடைமுறை? என தெரியவில்லை.
நாடாளுமன்ற ஜனநாயக மரபுகளை ஒழிக்கும் சதித்திட்டமாகவே இதனை கருத வேண்டும். ஒரு ஜனநாயக நாட்டில் எதிர்க்கட்சிகளின் குரல்கள் வலுவாக இருந்தால் மட்டுமே நாடு உயிருடன் இருக்கும். அந்த குரல்களை ஒடுக்கும் செயலாகவே இதனை கருத வேண்டும்.
கரோனா நெருக்கடி காலகட்டத்தில், அமெரிக்கா தேர்தலை நடத்தி ஜனநாயகத்தை காக்கிறது. மிகப்பெரிய ஜனநாயக நாடான நாம் நமது நாடாளுமன்றத்தை பூட்டியுள்ளோம்.
புதிய சன்சாத் பவன் கட்டுவதற்கு ரூ.900 கோடி செலவிடப்படுகிறது. பூட்டியே வைத்திருக்க எதற்கு புதிய நாடாளுமன்ற கட்டடம் கட்டப்படுகிறது. ஒருவேளை வெளியில் இருந்து அதனை பூட்டவா ?” என குறிப்பிடப்பட்டுள்ளது.
இதையும் படிங்க : அச்சுறுத்தலுக்கு அஞ்சமாட்டோம் - மாஸ் காட்டும் மம்தா
