தமிழ்நாட்டில் கடந்த 2013ஆம் ஆண்டு குட்கா உள்ளிட்ட புகையிலைப் பொருட்களை விற்பனை செய்வதற்கு தடை செய்யப்பட நிலையில், சட்டத்திற்குப் புறம்பான வகையில் குட்கா பொருட்கள் தயாரித்து விற்பனை செய்யப்பட்டது. கடந்த ஆண்டு இந்த விவகாரம் பெரும் பூதாகரமாக வெடிக்கவே, சென்னை உயர் நீதிமன்றத்தின் வழிகாட்டுதலின்படி சிபிஐ அமைப்பானது வழக்குப்பதிவு செய்து விசாரணை மேற்கொண்டது.
சிபிஐ மேற்கொண்ட விசாரணையில் தொழிலதிபர்கள் மாதவராவ், சீனிவாச ராவ், உமாசங்கர் குப்தா உள்ளிட்ட பலர் சட்ட விரோதமாக குட்கா விற்பனையில் ஈடுபட்டது தெரியவந்துள்ளது. மேலும் குட்கா தடை செய்யப்பட்ட மாநிலங்களான தமிழ்நாடு, புதுச்சேரியில் அதை விற்றதன் மூலம் சுமார் 639.40 அளவில் வியாபாரம் மேற்கொண்டுள்ளதும் விசாரணையில் உறுதியானது.
மேலும், அதன் வருவாயை வைத்து தனக்கு சொந்தமாக அசையா சொத்துக்கள் பலவற்றை அவர்கள் வாங்கியதும் தெரியவந்துள்ளது. அதுமட்டுமின்றி ஆந்திராவிலும், தமிழ்நாட்டின் பல பகுதிகளிலும் முதலீடு செய்யப்பட்டதும் வெளிச்சத்திற்கு வந்துள்ளது.
இந்நிலையில் சட்டவிரோத பணப்பரிவர்த்தனை தடுப்புச்சட்டம் (PMLA ACT) மூலம் இவர்களின் 246 கோடி ரூபாய் மதிப்பிலான 174 அசையா சொத்துகளை அமலாக்கத் துறை முடக்கியுள்ளது. மேலும் சில கோடி ரூபாய் மதிப்பிலான அசையும் சொத்துகள் மற்றும் வாகனங்களையும் அமலாக்கத் துறை முடக்கியுள்ளதாகத் தகவல் வெளியாகியுள்ளது.
