ரஜினிகாந்த் குணமடைந்து வீடு திரும்ப அங்கப் பிரதட்சணம் செய்து ரசிகர்கள் சிறப்பு வழிபாடு! - Rajini fans prayer in Thoothukudi

தூத்துக்குடி: கோவில்பட்டியில் சொர்ணமலை கதிர்வேல் முருகன் திருக்கோயிலில் நடிகர் ரஜினிகாந்த் விரைவில் குணமடைந்து வீடு திரும்ப அங்கப் பிரதட்சணம் செய்து அவரது ரசிகர்கள் பிராத்தனை செய்தனர்.

நடிகர் ரஜினிகாந்த ரத்த நாளத்தில் ஏற்பட்ட வீக்கம் மற்றும் பாதிப்பு காரணமாக செப்டம்பர் 30ஆம் தேதி சென்னை அப்போலோ மருத்துவமனையில் அனுமதிக்கப்பட்டு சிகிச்சை பெற்று வருகிறார். அவருக்கு முதலமைச்சர் உள்ளிட்ட பல்வேறு தலைவர்கள், நலம் பெற வேண்டுமென்று தங்களது எக்ஸ் தளத்தில் பதிவிட்டனர்.

இந்நிலையில், ரஜினிகாந்த் பரிபூரண நலம் பெற்று விரைவில் வீடு திரும்ப வேண்டும் என அவரது ரசிகர்கள் பிரார்த்தனை மற்றும் சிறப்பு பூஜைகள் வழிபாடுகளில் ஈடுபட்டு வருகின்றனர். அந்த வகையில், தூத்துக்குடி கோவில்பட்டியில் உள்ள சொர்ணமலை கதிர்வேல் முருகன் திருக்கோயிலில், கோவில்பட்டி அனைத்து ரஜினி ரசிகர் மன்றங்கள் சார்பில், ஒருங்கிணைப்பாளர் சீனிவாசன் தலைமையில், ரஜினிகாந்த் நீண்ட ஆயுளும், நல்ல ஆரோக்கியமும் பெற வேண்டி நிர்வாகிகள் மூவர் அங்கப் பிரதட்சணம் செய்து வழிபாடு நடத்தினர்.

தொடர்ந்து, ரஜினிகாந்த் பெயருக்கு அர்ச்சனை செய்து சிறப்பு பூஜைகள் நடத்தினர். மேலும்,பொதுமக்களுக்கு மஞ்சள், குங்குமம் உள்ளிட்ட மங்கலப் பொருட்களை வழங்கினர்.