மதுரை: ரஜினியின் தீவிர பக்தர் ஒருவர் மதுரையில் நடிகர் ரஜினிகாந்த்க்கு கோயில் அமைத்து வழிபட்டு வருகிறார். இந்த நிலையில், ரஜினி தனது தீவிர ரசிகரை குடும்பத்துடன் நேரில் அழைத்து கௌரவித்ததுடன், குடும்பத்தார் அனைவருக்கும் புத்தாடை வழங்கியுள்ளார். தற்போது அந்த புத்தாடையுடன், தான் கட்டிய அருள்மிகு ஸ்ரீரஜினி திருக்கோயிலில் ரஜினியின் சிலை முன்பாக பொங்கல் வைத்து ரசிகர் கொண்டாடி மகிழ்ந்தார்.
மதுரை மாவட்டம் திருமங்கலத்தைச் சேர்ந்த துணை ராணுவப்படையின் முன்னாள் வீரர் கார்த்திக், தனது வீட்டிலேயே தமிழ் திரைப்பட நடிகர் ரஜினிகாந்துக்கு கோயில் கட்டி, உருவ சிலை அமைத்து வழிபட்டு வருகிறார். கடந்த டிசம்பர் மாதம் ரஜினியின் பிறந்தநாளன்று, சுமார் 300 கிலோ எடையுள்ள கருங்கல்லால் ஆன புதிய ரஜினி சிலையை பிரதிஷ்டை செய்திருந்தார்.
இந்நிலையில், கடந்த ஜனவரி இரண்டாம் தேதி நடிகர் ரஜினிகாந்த், கார்த்திக் மற்றும் அவரது குடும்பத்தாரை சந்திக்க நேரம் ஒதுக்கியிருந்தார். அப்போது, ரஜினிகாந்தை தனது குடும்பத்தாருடன் சந்தித்து 35 நிமிடங்களுக்கும் மேல் தங்களோடு இருந்து நலம் விசாரித்ததுடன், குடும்ப உறுப்பினர்கள் அனைவருக்கும் புத்தாடை எடுத்துக் கொடுத்திருந்ததாக தெரிவித்தனர்.
தற்போது, ரஜினிகாந்த் எடுத்துக் கொடுத்த புத்தாடைகளோடு தனது ஸ்ரீரஜினி திருக்கோயிலில் ரஜினியின் சிலைக்கு முன்பாக நேற்று பொங்கலிட்டு படையல் செய்தார். ரஜினியின் தீவிரப் பற்றாளர் கார்த்திக், அவரது மனைவி ரோகிணி, மகள் ரேஷ்மா மற்றும் சகோதரர் சங்கர் ஆகியோருடன் பொங்கல் விழாவைச் சிறப்புடன் கொண்டாடினார்.
இதுகுறித்து, ஈடிவி பாரத் தமிழ் ஊடகத்திற்கு கார்த்திக் வழங்கிய பேட்டியில், "ஒரு மனிதன் பிறந்ததற்குப் பிறகு அவனது தாய், தந்தையர் உடை எடுத்துக் கொடுப்பர். அதற்குப் பிறகு, வேலைக்குச் சென்று பொருளீட்டி அவரே எடுத்துக் கொள்வார். பிறகு திருமணம் ஆன பின்னர் அவரது மகனோ, மகளோ உடை எடுத்துக் கொடுப்பதென்பது நமது வழக்கம். எங்களைப் பொறுத்தவரை நான்காவதாக நாங்கள் குலசாமியாக வணங்கும் நடிகர் ரஜினிகாந்த் இந்தப் புத்தாண்டின்போது நேரில் எங்களை வரவழைத்து ஆடைகள் வழங்கியதை மிகப்பெரிய கொடுப்பினையாகப் பார்க்கிறோம்.
இதையும் படிங்க: சமத்துவ பொங்கல்: கோலகலமாக கொண்டாடிய ஆவடி காவலர்கள்!
முதன்முதலாக கடந்த ஜனவரி இரண்டாம் தேதி சென்னை போயஸ் தோட்டத்தில் உள்ள அவரது வீட்டில் சந்திக்க வாய்ப்பு கிடைத்தது. அவரைப் பார்த்ததும் பேச்சே வரவில்லை. படையப்பா பட ஸ்டில்லில் அமைந்த சிலை, பாபா சிலை, ராகவேந்திரர் படம் ஆகியவற்றை வழங்கி எங்களோடு 35 நிமிடங்களுக்கும் மேல் உரையாடினார். அவரது கண்ணில் இருந்த அளப்பரிய ஆற்றலை அப்போதுதான் உணர்ந்தேன்.
அன்போடும் மரியாதையோடும் பழகுவதில் அவர் ஒரு அதிசயம்தான், ஆச்சரியமும்தான். அதற்காகவே இந்தப் பொங்கலை எங்களின் ரஜினி கோயிலில் உள்ள அவரது சிலையின் முன்பாக படையலிட்டு வணங்கி கொண்டாடியுள்ளோம்" என மகிழ்ச்சியுடன் தெரிவித்தார்.
