திருச்சி: பொங்கல் திருநாளின் 3-வது நாளான இன்று (ஜனவரி 16) காணும் பொங்கல் கொண்டாடப்படுகிறது. இது கன்னிப்பொங்கல் என்றும், கணுப்பண்டிகை என்றும் அழைக்கப்படும். இந்நாளில் உற்றார், உறவினர், நண்பர்களைக் காணுதல் மற்றும் பெரியோர்களிடம் ஆசிபெறுதல் போன்ற கலாசாரங்கள் கடைப்பிடிக்கப்பட்டு வருகின்றன.
காணும் பொங்கலையொட்டி மக்கள் சுற்றுலாத் தலங்களுக்கு தங்கள் குடும்பத்தினருடன் சென்று உற்சாகமாக கொண்டாடி வருகின்றனர். அதன்படி, காணும் பொங்கலான இன்று காலை முதலே திருச்சி முக்கொம்பு சுற்றுலா தலத்திற்கு மக்கள் தங்கள் குடும்பத்தினருடன் வந்து, உற்சாகமாக விளையாடியும், பல்வேறு பொழுதுபோக்கு அம்சங்களில் பொழுதைக்கழித்தும் காணும் பொங்கலைக் கொண்டாடி மகிழ்ந்து வருகின்றனர்.
திருச்சி மாவட்டத்தில் முக்கொம்பு, கல்லணை, வண்ணத்துப்பூச்சி பூங்கா சிறந்த சுற்றுலா தலமாக திகழ்ந்து வருகிறது. கிராமப்புறங்களில் உறவினர்களுடன் ஒன்றுகூடி, உணவு சமைத்து அனைவரும் ஒன்றாக அமர்ந்து பரிமாறி உண்டு மகிழ்ந்து வருகின்றனர். நகர்ப்புறங்களில் கலாசார மாற்றத்தினையடுத்து, இதுபோன்று சுற்றுலாத் தலங்களுக்குச் சென்று குடும்பத்தினர், உறவினர்களுடன் கொண்டாடி மகிழ்கின்றனர்.
இதையும் படிங்க: அலங்காநல்லூர் ஜல்லிக்கட்டு: ‘யாராவது காளையப் புடிங்கப்பா’ - கடுப்பான வர்ணனையாளர்!
மேலும், சுற்றுலாவிற்கு வந்தவர்கள் முக்கொம்பு அணையில் பிடிக்கப்பட்ட மீன்களை வாங்கிச் செல்கின்றனர். பலர் குளிப்பதற்காக ஒதுக்கப்பட்ட பகுதியில் குடும்பத்துடன் நீராடி மகிழ்ந்துள்ளனர். பாதுகாப்பு ஏற்பாடுகள் குறித்து திருச்சி மாவட்ட காவல்துறை கண்காணிப்பாளர் செல்வ நாகரத்தினம் நேரில் ஆய்வு மேற்கண்டுள்ளார். சுற்றுலாப் பயணிகளின் கூட்டம் அலைமோதுவதால் முக்கொம்பில் காவலர்கள் குவிக்கப்பட்டு கண்காணிப்புப் பணியில் ஈடுபட்டு வருகின்றனர்.
இது குறித்து திருச்சியை சேர்ந்த சுற்றுலா பயணி பத்மா கூறுகையில், “பொங்கல் விடுமுறையை பொதுவான இடத்தில் கொண்டாட வேண்டும் என்ற நோக்கத்தில் அனைவரும் ஒன்று சேர்ந்து, உணவு சமைத்து முக்கொம்பு சுற்றுலாத் தலத்தை சுற்றி பார்த்தோம். திருச்சி மாவட்டத்தில் முக்கொம்பு சுற்றுலா தலம் முக்கிய இடமாக இருந்து வருகிறது. இருப்பினும் மேலும் சில விளையாட்டு உபகரணங்களை அமைக்க வேண்டும்” என கோரிக்கை விடுத்துள்ளனர்.
