சென்னை: திருவல்லிக்கேணி, ஜாம்பஜார், ஐஸ் ஹவுஸ், ராயப்பேட்டை பகுதிகளில் கஞ்சா விற்பனை நடைபெறுவதாக போலீசாருக்கு புகார்கள் வந்துள்ளன. அதன் பேரில், போலீசார் மேற்கண்ட பகுதிகளில் கஞ்சா புழக்கம் இருக்கிறதா என்று தீவிர கண்காணிப்பில் ஈடுபட்டுள்ளனர்.
இந்த நிலையில், திருவல்லிக்கேணி பகுதியில் போலீசார் சோதனையில் ஈடுபட்டு கொண்டிருந்தபோது, சந்தேகப்படும்படியாக ஆண், பெண் இருவர் இருசக்கர வாகனத்தில் சுற்றிக் கொண்டிருந்ததைக் கண்ட போலீசார், அவர்களை மடக்கி விசாரித்துள்ளனர். அப்போது, பைக்கில் இருந்த பெண் பிரபல கஞ்சா வியாபாரி நிஷா என்ற ரஹமத் நிஷா (34) என்பது தெரிய வந்துள்ளது.
மேலும், ரஹமத் நிஷா தன்னுடன் வந்த ஆண் நண்பர் சையது முஸ்தாக் பாஷாவுடன் சேர்ந்து, அப்பகுதியில் கஞ்சா விற்று வருவது தெரிய வந்துள்ளது. பின்னர், அவர்கள் இருவரையும் போலீசார் கைது செய்து, அவர்கள் வைத்திருந்த ஒன்றே கால் கிலோ கஞ்சா, ஒரு இருசக்கர வாகனம், 30 ஆயிரம் ரூபாய் ரொக்கம், எடை மெஷின் ஆகியவற்றை பறிமுதல் செய்துள்ளனர்.
