தூத்துக்குடி: தூத்துக்குடி கற்குவேல் அய்யனார் கோயிலில் பரம்பரை பட்டறைக் காரர்களின் பூஜைக்கு இந்து சமய அறநிலையத்துறை மறுப்பு தெரிவித்த நிலையில் மாவட்ட நிர்வாகம் இது குறித்து நடவடிக்கை எடுக்க கோரி அந்த சமுதாயத்தினர் நேற்று(டிச.4) இரவு திருச்செந்தூர் தாலுகா அலுவலகத்தில் காத்திருப்பு போராட்டத்தில் ஈடுபட்டதால் பெரும் பரபரப்பு ஏற்பட்டது.
தூத்துக்குடி மாவட்டம் திருச்செந்தூர் தாலுகா, காயாமொழியில் இருந்து ஒரு கிலோ மீட்டர் தொலைவில் குதிரைமொழி தேரிக்குடியிருப்பு என்ற கிராமம் உள்ளது. இந்த கிராமத்தில் தென் மாவட்டத்தில் பிரசித்தி பெற்ற கற்குவேல் அய்யனார் கோயில் அமைந்துள்ளது. இந்த கோயிலில் நடைபெறக்கூடிய 'கள்ளர் வெட்டு திருவிழா' மிகவும் பிரசித்தி பெற்ற நிகழ்வாகும்.
இந்த கள்ளர் வீட்டு திருவிழாவானது கார்த்திகை மாதம் 30 நாட்கள் வெகு விமரிசையாக கொண்டாடப்படும் நிலையில் மாத இறுதி நாளன்று செம்மனல் தேரிக்காடு பகுதியில் கள்ளர் வெட்டு நிகழ்வு நடைபெறும். இந்த நிகழ்ச்சியில் லட்சக்கணக்கான பக்தர்கள் கலந்து கொள்வார்கள். இந்த கோயிலில் பரம்பரை பட்டறைக் காரர்களான ஓர் சமுதாயத்தினர் சார்ந்தவர்கள் காலம் காலமாக பூஜை, புனஸ்க்காரம் செய்து வருகின்றனர்.
இந்நிலையில், இந்த ஆண்டு திருவிழா தொடக்கத்தில் இருந்து இந்து சமய அறநிலையத்துறை அதிகாரிகள் பரம்பரை பட்டறைக்காரர்களை பூஜை செய்யக்கூடாது என தெரிவித்ததாக கூறப்படுகிறது. இது குறித்து பேசிய பரம்பரை பட்டறைக்காரர்களுள் ஒருவரான சங்கரலிங்கம், “காலம், காலமாக எங்கள் எங்கள் சமுதாயத்தினர் கோயிலுக்கு பூஜை செய்து வந்தோம். ஆனால், திடீரென இந்து சமய அறநிலைத்துறை அதிர்ச்சி அளிக்கும் வகையில் எங்களை பூஜை செய்யக்கூடாது என கூறிகின்றனர். மாவட்ட நிர்வாகம் உடனடியாக எங்களை பூஜை செய்வதற்கு அனுமதி அளிக்க வேண்டும். இது குறித்து நாங்கள் மனு அளித்துள்ளோம்” என்றார்.
இதையும் படிங்க: விஜய்க்காக மாங்காடு காமாட்சி அம்மன் கோயிலில் தங்க தேர் இழுத்த தவெக பெண் நிர்வாகிகள்!
மேலும் இது குறித்து பேசிய முருகம்மாள் கடந்த 16.11. 2024 கார்த்திகை மாத பிறப்பிற்காகவும், கள்ளர் வெட்டு திருவிழா ஆரம்ப பூஜைக்காகவும் வழக்கம்போல் பூஜை செய்ய நாங்கள் பரம்பரை பட்டறைக்காரர்கள் சுமார் 100 பேர் கோயிலுக்கு சென்றோம்.
அப்போது இந்து சமய அறநிலையத்துறை சார்பில் நாங்கள் பூஜை செய்ய மறுப்பு எழுந்தது. இந்த பாரமரியத்தை நாங்கள் கடைப்பிடிக்க வேண்டுமானல் இந்த சடங்குகள் செய்வதற்கான பூர்விக பத்திரங்கள் கேட்கிறார்களால் ஆனால் எங்களிம் அவ்வாறு எதுவும் இல்லை. எனவே மாவட்ட நிர்வாகம் எங்களது பாரம்பரிய கலாச்சாரத்தை கருத்தில் கொண்டு இதற்கு அனுமதி வழங்குமாறு கேட்டுகொள்கிறோம்” என்றார்.
இந்நிலையில், நேற்று (டிச.4) இரவு இந்த சமுதாயத்தை சேர்ந்த 200க்கும் மேற்பட்டோர் திருச்செந்தூர் தாலுகா அலுவலகத்தில் காத்திருப்பு போராட்டத்தில் ஈடுபட்டனர். அவர்கள் அங்கேயே இரவு உணவு சாப்பிட்டு தொடர்ந்து போராட்டத்தில் ஈடுப்பட்டதால் பெரும் பரபரப்பு ஏற்பட்டது. இதையடுத்து அதிகாரிகள் பேச்சுவார்த்தை நடத்தி போராட்டகாரர்களை அங்கிருந்து கலைந்து போக செய்தனர்.
