கண்ணில் ஏற்படும் பாதிப்பான கண்புரை நோய், பெரியவர்களுக்கு ஏற்படுவதை போல பிறந்த குழந்தைகளுக்கும் ஏற்படும் என்பது நம்மில் எத்தனை பேருக்கு தெரியும்? 2022ம் ஆண்டு நடத்தப்பட்ட ஆய்வில் குழந்தைகளை கண்புரை நோய் அதிகம் பாதிப்பதாக தெரியவந்துள்ளது. அதன்படி, இந்தியாவில் நடத்தப்பட்ட ஆய்வில், 10 ஆயிரத்தில் 6 குழந்தைகளுக்கு பிறவிலேயே கண்புரை பாதிப்பு ஏற்படுவதாகவும், இதில் 10 சதவீத குழந்தைகளுக்கு பார்வை இழக்கும் அபாயம் ஏற்படுவதாக அதிர்ச்சி தகவல் வெளியாகியது.
கண்புரை நோய் என்றால்?: கண்புரை பாதிப்பு ஏற்பட்டால் பார்வை மங்கலாக, தெளிவில்லாமல் இருக்கும். உதாரணத்திற்கு, மூடுபனியின் போது கார் கண்ணாடியின் வழியாக வெளியே பார்க்க முயற்சிப்பதை கற்பனை செய்து பாருங்கள். கண்புரை பாதிப்பு ஏற்பட்டவர்களுக்கு இப்படித்தான் பார்வை இருக்கும். கண்களில் உள்ள லென்ஸில் உள்ள புரதம் உடைந்து பார்வையை மங்கலாக்குகிறது. இதுவே, கண்புரை நோய்.
காரணம்?: குழந்தைகளுக்கு கண்புரை தொற்று ஏற்படுவதற்கு, கர்ப்ப காலத்தில் தாய்வழி நோய் தொற்று, மரபணு வளர்ச்சியில் முரண்பாடு போன்ற காரணங்களாக இருக்கலாம். மேலும், கண் சார்ந்த பிரச்சனை, வீக்கம், ஸ்டீராய்டு போன்றவற்றின் பயன்பாடும் கண்புரை தொற்றை ஏற்படுத்தும்.
ஆரம்ப கால அறிகுறிகள்: கண்புரை நோய் அறிகுறி பிறந்த மற்றும் வயதில் மூத்த குழந்தைகளுக்கு வெவ்வேறாக இருக்கலாம்.
- பிறந்த குழந்தைகள்: கருவிழியில் வெள்ளை அல்லது சாம்பல் நிறத்தில் புள்ளி போல் தென்படுவது. இது பொதுவாக, வெளிச்சம் மற்றும் புகைப்படத்தில் தெளிவாக தெரியும்.
- வெவ்வேறு திசைகளைப் பார்த்தபடி கருவிழிகள் இருப்பது.
- கைக்குழந்தைகள் முகங்களை அடையாளம் காண சிரமப்படுவது
- வெளிச்சத்தை பார்க்க முடியாமல், ஒளி கண்களில் அசெளகரியத்தை ஏற்படுத்துவது. இந்த அறிகுறிகளை நீங்கள் குழந்தையிடம் கண்டறிந்தால் உடனடியாக மருத்துவரை அணுகவும்.
வயதில் மூத்த குழந்தைகள் (பள்ளி வயது குழந்தைகள்):
- மங்கலாக அல்லது சிதைந்த பார்வை, படங்களை தெளிவாக பார்க்க முடியாமல் போவது
- ஒரு பொருள் இரண்டாக தெரிவது
- இரண்டு கண்களும் ஒரே நேரத்தில் வெவ்வேறு திசையை பார்ப்பது
- கட்டுப்பாடற்ற கண் அசைவுகள்
- படிக்கும் போது புத்தகங்களை கண்களுக்கு அருகில் வைத்து படிப்பது, விளையாடும் போது பொம்மைகளை கண்களுக்கு அருகில் வைப்பது. இந்த ஆரம்ப கால அறிகுறிகளை கண்டறிந்து, மருத்துவ ஆலோசனை பெற்றால் இந்த நோய் பாதிப்பை தடுக்கலாம்.
சிகிச்சை: குழந்தைகளில் கண்புரை பாதிப்பு ஏற்பட்டால், பெரும்பாலும் அறுவை சிகிச்சை செய்யப்படுகிறது. மேகமூட்டமான லென்ஸ்கள் அகற்றப்பட்டு இன்ரோகுளார் லென்ஸ் (IOL) பொருத்தப்படும். சிகிச்சைக்குப் பின் சில குழந்தைகளுக்கு கண்ணாடி அணிய வேண்டியிருக்கும். கண்புரை நோயை தொட்டகநிலையில் கண்டறிந்தால், எளிதாக நீக்கிவிடாமல் என்கின்றனர் நிபுணர்கள்.
இதையும் படிங்க: முதுமையில் கூர்மையான பார்வையை தக்கவைக்கும் 6 காய்கறிகள்!
பொறுப்புத் துறப்பு: இங்கு, உங்களுக்கு வழங்கப்படும் அனைத்து தகவல்களும், பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை நாங்கள் வழங்குகிறோம். இவற்றைப் பின்பற்றும் முன் உங்கள் தனிப்பட்ட மருத்துவரின் ஆலோசனையைப் பெறுவது நல்லது என்பதை குறிப்பிடுகிறோம்.
