தூத்துக்குடி: அறிவுரை வழங்கிய காவலாளியை ஒன்பதாம் வகுப்பு படித்து வரும் மாணவன் அரிவாளால் வெட்டிய சம்பவம் தூத்துக்குடியில் அதிர்ச்சியை ஏற்படுத்தியுள்ளது.
தூத்துக்குடி மாவட்டம், கோவில்பட்டி வீரவாஞ்சி நகர் முதல் தெருவை சேர்ந்தவர் ராஜன் மகன் பாலகுமார் (28). இவர் கோவில்பட்டி கதிரேசன் கோவில் சாலையில் உள்ள அரசு உதவி பெறும் பள்ளியில் காவலாளியாக பணியாற்றி வருகிறார்.
இந்நிலையில், இவர் நேற்று (ஜன.18) பள்ளி அருகே உள்ள கடையில் உட்கார்ந்து கொண்டிருந்தார். அதன் பின்னர் அங்கிருந்து புறப்பட்ட பாலகுமாரை அதே பள்ளியில் 9ம் வகுப்பு பயிலும் 14 வயது சிறுவன் அரிவாளால் தாக்கியுள்ளார். இதில், அவருக்கு கழுத்தருகே வெட்டு காயம் ஏற்பட்டுள்ளது. இதனை தொடர்ந்து காயமடைந்த பாலகுமார் கோவில்பட்டி அரசு மருத்துவமனையில் சிகிச்சை பெற்று வீடு திரும்பினார்.
இதையும் படிங்க: குடிபோதையில் சிறுவனை தாக்கிய திமுக நிர்வாகி? - புகார் அளித்தும் நடவடிக்கை எடுக்கவில்லை என குற்றச்சாட்டு!
இதுகுறித்து அவர் அளித்த புகாரின் பேரில் மேற்கு காவல் நிலைய போலீசார் வழக்குப் பதிவு செய்து சிறுவனை பிடித்து இளம் சிறார் நீதி குழுமத்தில் ஆஜர் படுத்தினர். பின்னர் சிறுவனுக்கு அறிவுரை மற்றும் கவுன்சிலிங் வழங்கி விடுவித்தனர்.
போலீஸ் விசாரணையில், காவலாளி பாலகுமார் மாணவன் சுற்றி திரிவதை கண்டித்து, படிக்கும் படி அடிக்கடி அறிவுரை வழங்கியதால் ஆத்திரத்தில் வெட்டியதாக சிறுவன் கூறியதாக தெரிய வந்துள்ளது.
மேலும், இந்த சம்பவம் பள்ளி வட்டாரத்தில் மிகுந்த பரபரப்பை ஏற்படுத்தியுள்ளது.
