சென்னை: வரும் ஆகஸ்ட் 15ஆம் தேதி சுதந்திர தினத்தன்று தங்கலான், டிமாண்டி காலனி, ரகு தாத்தா படங்கள் நீண்ட வார விடுமுறையை முன்னிட்டு திரையரங்குகளில் வெளியாகிறது. தமிழ் சினிமாவில் வெகு நாட்களுக்கு பிறகு பெரிய படங்கள் ஒரே நாளில் வெளியாகிறது. அந்த படங்களுக்கு உள்ள எதிர்பார்ப்பு குறித்து இந்த செய்தித் தொகுப்பில் காணலாம்.
தங்கலான்: பா.ரஞ்சித் இயக்கத்தில் விக்ரம், மாளவிகா, பார்வதி, பசுபதி உள்ளிட்ட பலர் நடிப்பில் உருவாகியுள்ள படம் தங்கலான். சுதந்திரத்திற்கு முன்னதாக கோலார் தங்க சுரங்கத்தில் மக்கள் சந்தித்த பிரச்சனைகளை மையமாக கொண்டு இப்படம் உருவாக்கப்பட்டுள்ளது. இப்படம் அறிவிக்கப்பட்டது முதல் எதிர்பார்ப்பு ஏற்பட்டது. மேலும் இப்படத்தில் நடித்துள்ள அனைவரும் வித்தியாசமான கெட்டப்பில் கதாபாத்திரத்தின் முக்கியத்துவத்தை உணர்ந்து 100 சதவீத உழைப்பை வழங்கியுள்ளதாக தெரிகிறது.
ஒவ்வொரு படத்திலும் தனது தோற்றத்திலும், நடிப்பிலும் பாராட்டை பெறும் விக்ரமின் நடிப்பை இப்படத்தில் காண ரசிகர்கள் ஆவலுடன் உள்ளனர். மேலும் விக்ரம் நடித்த படங்களில் தங்கலான் அதிக பாக்ஸ் ஆபிஸ் வசூல் பெறும் என எதிர்பார்க்கப்படுகிறது. மேலும் தங்கலான் படத்தில் பார்வதி, பசுபதி போன்ற அனுபவம் வாய்ந்த நடிகர்கள் இடம்பெற்றுள்ளது கூடுதல் பலமாக பார்க்கப்படுகிறது. இருப்பினும் தற்போது சினிமா பார்வையாளர்கள் பொதுவாக ஒரு படத்தில் விறுவிறுப்பான திரைக்கதையை விரும்புகின்றனர். அதனை தங்கலான் பூர்த்தி செய்யும் பட்சத்தில் வரவேற்பைப் பெறும்.
டிமாண்டி காலனி 2: அஜய் ஞானமுத்து இயக்கத்தில் அருள்நிதி, ப்ரியா பவானி ஷங்கர் உள்ளிட்ட பலர் நடித்துள்ள திரைப்படம் ‘டிமாண்டி காலனி 2’. டிமாண்டி காலனி முதல் பாகத்தில் தொடர்ச்சியாக இப்படம் உருவாக்கப்பட்டுள்ளது. டிமாண்டி காலனி வெளியானது முதல் சென்னையில் உள்ள உண்மையான டிமாண்டி காலனிக்கு பொதுமக்கள் அதிகமாக சென்று புகைப்படம் எடுத்தனர். அந்தளவிற்கு டிமாண்டி காலனி வரவேற்பை பெற்றது.
இதனைத்தொடர்ந்து டிமாண்டி காலனி 2 பாகத்திற்கும் எதிர்பார்ப்பு ஏற்பட்டது. மேலும் படத்தின் இயக்குநர் அஜய் ஞானமுத்து இப்படத்தை 4 பாகங்களாக உருவாக்கவுள்ளதாக தெரிவித்துள்ளார். இந்நிலையில் இன்று சிறப்புக் காட்சியை பார்த்த சிலர் படம் சிறப்பாக உள்ளதாக சமூக வலைதளத்தில் பதிவிட்டு வருகின்றனர். அதே நேரத்தில் சமீப காலமாக தமிழ் சினிமாவில் எடுக்கப்படும் இரண்டாம் பாகத்தின் திரைப்படங்கள் எதிர்பார்த்த வெற்றியை பெறுவதில்லை. இந்த வரலாற்றை மாற்றி எழுதி டிமாண்டி காலனி 2ஆம் பாகம் வெற்றி பெறும் என ரசிகர்கள் எதிர்பார்ப்பில் உள்ளனர்.
ரகுதாத்தா: ஹோம்பலே பிலிம்ஸ் தயாரிப்பில் சுமன் குமார் இயக்கத்தில் ஷான் ரோல்டன் இசையில் முன்னணி நடிகை கீர்த்தி சுரேஷ் நடிப்பில் உருவாகியுள்ள திரைப்படம் ‘ரகுதாத்தா’. இப்படத்தின் டீசரில் இந்தி திணிப்பு போன்ற வசனங்கள் இடம்பெற்றது. ஆனால் ரகுதாத்தா அனைத்து விதமான திணிப்பு பற்றியது என கீர்த்தி சுரேஷ் படத்தின் விளம்பர நிகழ்ச்சியில் தெரிவித்துள்ளார்.
மேலும் இப்படம் டிரெய்லரில் நகைச்சுவை காட்சிகள் வரவேற்பைப் பெற்றது. அதே நேரத்தில் ரகுதாத்தா திரைப்படம் வேற்று மொழி திரைப்படம் என்பது போன்ற பிம்பம் ரசிகர்கள் மத்தியில் உருவாகியுள்ளது. கீர்த்தி சுரேஷ் முன்னணி கதாபாத்திரத்தில் நடித்த 'மகாநதி' திரைப்படத்திற்காக தேசிய விருது பெற்றார் என்பது குறிப்பிடத்தக்கது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: பத்து எண்றதுகுள்ள கங்குவா இங்க வரணும்.. மிரட்டலுடன் வெளியானது 'கங்குவா' டிரெய்லர்! - KANGUVA TRAILER
