கனடாவில் இந்து கோவில் தாக்கப்பட்டற்கு பிரதமர், பஞ்சாப் முதல்வர் கண்டனம்!

கனடாவில் இந்து கோவில் தாக்கப்பட்டதற்கு பிரதமர் நரேந்திர மோடி, பஞ்சாப் முதலமைச்சர் பகவந்த் மான் ஆகியோர் கண்டனம் தெரிவித்துள்ளனர்.

புதுடெல்லி: கனடாவின் பிராம்டன் பகுதியில் உள்ள இந்து கோவில் மீது காலிஸ்தான் அமைப்பினர் தாக்குதல் நடத்தியதற்கு பிரதமர் நரேந்திர மோடி, பஞ்சாப் முதலமைச்சர் பகவந்த் மான் ஆகியோர் கண்டனம் தெரிவித்துள்ளனர்.

கனடாவில் காலிஸ்தான் ஆதரவாளர்களுக்கு அடைக்கலம் கொடுத்திருப்பதன் காரணமாக இருநாடுகளுக்கு இடையே தூதரக உறவில் சிக்கல் எழுந்துள்ளது. இந்த நிலையில் கனடாவின் பிராம்டன் பகுதியில் உள்ள இந்து கோவிலில் இந்திய தூரகத்தின் சார்பில் இந்தியர்களுக்கு வாழ்நாள் சான்று வழங்கும் முகாம் கடந்த ஞாயிற்றுக்கிழமை நடைபெற்றது.

அப்போது அந்த கோவிலுக்கு கொடிகளுடன் வந்த காலிஸ்தான் அமைப்பினர் இந்தியாவுக்கு எதிராக கோஷங்கள் எழுப்பினர். மேலும் இந்து கோவிலில் இருந்த இந்தியர்களுக்கும் காலிஸ்தான் அமைப்பினருக்கும் இடையே வாக்குவாதம் எழுந்தது. காலிஸ்தான் அமைப்பினர் கோவில் மீது தாக்குதல் நடத்தியதாகவும் தகவல் வெளியாகி உள்ளது.

I strongly condemn the deliberate attack on a Hindu temple in Canada. Equally appalling are the cowardly attempts to intimidate our diplomats. Such acts of violence will never weaken India’s resolve. We expect the Canadian government to ensure justice and uphold the rule of law.

— Narendra Modi (@narendramodi) November 4, 2024

இந்த நிலையில் பிரதமர் நரேந்திர மோடி நேற்று வெளியிட்டுள்ள எக்ஸ் பதிவில், "கனடாவில் இந்து ஆலயம் மீது வேண்டுமென்றே நடத்தப்பட்ட தாக்குதலை நான் வன்மையாகக் கண்டிக்கிறேன். அதேபோல நமது தூதரக அதிகாரிகளை மிரட்டும் கோழைத்தனமான முயற்சிகளும் கண்டிக்கத்தக்கவை. இதுபோன்ற வன்முறைச் செயல்கள் இந்தியாவின் உறுதியை ஒருபோதும் பலவீனப்படுத்தாது. கனடா அரசு நீதியை உறுதிசெய்து சட்டத்தின் ஆட்சியை நிலைநாட்டும் என்று நாங்கள் எதிர்பார்க்கிறோம்,"என்று தெரிவித்துள்ளார்.

இதையும் படிங்க: கமலா ஹாரீஸ் வெற்றி பெற குலதெய்வம் கோவிலில் பூஜை செய்த கிராமத்தினர்!

இதே போல பஞ்சாப் முதலமைச்சர் பகவந்த் மான் வெளியிட்டுள்ள செய்தியில்,"இந்த சம்பவத்தை வண்மையாக கண்டிக்கின்றேன். இது போன்ற சம்பவங்கள் எதிர்காலத்தில் நிகழாதவாறு தடுக்க இந்திய அரசு கனடா அரசுடன் பேச்சுவார்த்தை நடத்த வேண்டும் என்று வலியுறுத்துகின்றேன்.பெரும்பாலான பஞ்சாபிகள் கனடாவை தங்களது இரண்டாவது தாய் வீடாக கருதுகின்றனர். அங்கு இது போன்ற வன்முறை நடைபெறுவதை யாரும் விரும்பவில்லை," என்று தெரிவித்துள்ளார்.

கனடாவில் இந்து கோவில் மீது தாக்குதல் நடத்தப்பட்டதற்கு காங்கிரஸ் கட்சியும் கண்டனம் தெரிவித்துள்ளது. இது குறித்து வீடியோ செய்தி வெளியிட்டுள்ள காங்கிரஸ் கட்சியின் பரப்புரை துறை தலைவர் பவான் கேரா,"இந்த விவகாரம் குறித்து கனடா அதிகாரிகளிடம் இந்தியா கடுமையாக எதிர்ப்புத் தெரிவிக்க வேண்டும். கோவிலுக்குள் பக்தர்கள் போக க் கூடாது என்று யாரும் தடுக்க முடியாது," என்று கூறியுள்ளார்.

ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்