Panchayat Polls: ଖାଁଖାଁ ପାକଟମୁଣ୍ଡା ବୁଥ ପରିସର, ଭୋଟ ଦେବାକୁ ଆସିଲେନି ଗ୍ରାମବାସୀ

ଢେଙ୍କାନାଳ: ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଆଜି ଚତୁର୍ଥ ପର୍ଯ୍ୟାୟ ମତଦାନ । ଚାରିଆଡେ ଭୋଟରଙ୍କ ମନରେ ଉତ୍ସାହ । ସକାଳୁ ବୁଥ୍‌ ଆଗରେ ଲାଗିଛି ଲମ୍ବା ଲାଇନ । ମାତ୍ର ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ ଅନ୍ତର୍ଗତ ବାମ ପଞ୍ଚାୟତ ପାକଟମୁଣ୍ଡା ଗ୍ରାମର ବୁଥ ପରିସର ରହିଛି ଖାଁ ଖାଁ । ରାସ୍ତା ନାହିଁ ତ ଭୋଟ ନାହିଁ ବୋଲି ନାରା ଦେଇ ଭୋଟ ବର୍ଜନ କରିଛନ୍ତି ଲୋକେ । ଭୋଟର ଭୋଟ ଦେଉ ନଥିବାରୁ ପୁଲିଂ କର୍ମଚାରୀ ମଧ୍ୟ ଏକ ପ୍ରକାର ହାତ ବାନ୍ଧି ବସିଛନ୍ତି । ଯାହା ସୂଚନା ରହିଛି, ଗାଁକୁ ପକ୍କା ରାସ୍ତା ଓ ମୋବାଇଲ ନେଟୱାର୍କ ଦାବିରେ ଏହି ଗ୍ରାମବାସୀ ଭୋଟ ବର୍ଜନ କରିଛନ୍ତି । ପୂର୍ବରୁ ପାକଟମୁଣ୍ଡାବାସୀ ଭୋଟ ବର୍ଜନ ପାଇଁ ଚେତାବନୀ ଦେଇଥିଲେ । ଗାଁରେ କୌଣସି ପ୍ରାର୍ଥୀଙ୍କୁ ପୁରାଇ ନ ଦେବା ସହ ପ୍ରାର୍ଥୀମାନଙ୍କ ପୋଷ୍ଟର ମଧ୍ୟ ଚିରି ନିଆଁ ଲଗାଇ ଦେଇଥିଲେ । ତଥାପି ସେମାନଙ୍କ ସମସ୍ୟା ସମାଧାନ ନହେବାରୁ ବାଧ୍ୟ ହୋଇ ଭୋଟ ବର୍ଜନ ଜିଦ୍‌ରେ ଅଡି ବସିଛନ୍ତି ଗ୍ରାମବାସୀ । ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ