ଶୁଣୁ ନାହାନ୍ତି ସରକାର: ପିଲାଛୁଆ ଧରି ରାଜରାସ୍ତାରେ ବସିଛନ୍ତି ସ୍ୱାସ୍ଥ୍ୟକର୍ମୀ

ଦୀର୍ଘ 14 ଦିନ ହେଲାଣି ପୁନଃ ନିଯୁକ୍ତ ଦାବିରେ ବିଧାନସଭା ସମ୍ମୁଖରେ ଆନ୍ଦୋଳନ କରୁଛନ୍ତି ଛଟେଇ ଏଏନଏମ ସ୍ବାସ୍ଥ୍ୟକର୍ମୀ । ଏପରିକି ସେମାନେ ସାଙ୍ଗରେ ନିଜ ଛୋଟ ଛୁଆକୁ ଧରି ଧାରଣାରେ ବସି ରହିଛନ୍ତି । ଶୀତ ଯୋଗୁଁ ଛୁଆଙ୍କ ସ୍ବାସ୍ଥ୍ୟବସ୍ଥା ମଧ୍ୟ ବିଗିଡାବାରେ ଲାଗିଲାଣି । ହେଲେ ସ୍ବାସ୍ଥ୍ୟକର୍ମୀଙ୍କ ଏହି ଦୁର୍ଦ୍ଦଶା ପ୍ରତି କର୍ଣ୍ଣପାତ କରୁନାହାନ୍ତି ସରକାର । କୋରୋନା ନ ଯିବା ପୂର୍ବରୁ ସରକାର ସେମାନଙ୍କୁ ଛଟେଇ କରିଛନ୍ତି । ସେମାନଙ୍କୁ ବକେୟା ପ୍ରାପ୍ୟ ମଧ୍ୟ ପ୍ରଦାନ କରାଯାଇ ନାହିଁ । ଏଣୁ ପୁନଃ ନିଯୁକ୍ତ ଦାବିରେ ଖରା ଶୀତ ସହି ଗଳା ଫଟାଇ ସରକାରଙ୍କୁ ଗୁହାରି ଜଣାଉଥିଲେ ମଧ୍ୟ ନିଦା ବିଷ୍ଣୁ ସାଜିଛନ୍ତି ସରକାର । ତେବେ ଦାବି ପୂରଣ ନ ହେଲା ଯାଏଁ ସେମାନେ ଆନ୍ଦୋଳନରୁ ଓହରିବେ ନାହିଁ ବୋଲି ସ୍ପଷ୍ଟ କରିଛନ୍ତି ଆନ୍ଦୋଳନରତ ସ୍ବାସ୍ଥ୍ୟକର୍ମୀ ।