ମହିଳାଙ୍କୁ ନିର୍ମମ ହତ୍ୟା: ସାମ୍ନାକୁ ଆସିଲା ହତ୍ୟାକାଣ୍ଡର ଛାତିଥରା ଦୃଶ୍ୟ

ଖୋର୍ଦ୍ଧା: ଖୋର୍ଦ୍ଧା ବାଣପୁର ଅଞ୍ଚଳର ଏକ ଅଳିଆ ଗଦାରୁ ଗତକାଲି(ଗୁରୁବାର) ଜଣେ ଅଚିହ୍ନା ମହିଳାଙ୍କ ମୃତଦେହ ଉଦ୍ଧାର ହୋଇଥିଲା  । ମୃତଶରୀରରେ ଗଭୀର କ୍ଷତ ଚିହ୍ନ ଥିବାରୁ ଏହା ହତ୍ୟାକାଣ୍ଡ ହୋଇଥାଇପାରେ ବୋଲି ପୋଲିସ ସନ୍ଦେହ କରୁଥିଲା । ଯାହା ଏବେ ସତ ପ୍ରମାଣିତ ହୋଇଛି । ହତ୍ୟାକାଣ୍ଡ ସ୍ଥଳରେ ଲାଗିଥିବା ସିସିଟିଭିରୁ ଛାତି ଥରାଇବା ଭଳି ଦୃଶ୍ୟ ସାମ୍ନାକୁ ଆସିଛି । ଘଟଣାଟି ବୁଧବାର ବିଳମ୍ବିତ ରାତି ପ୍ରାୟ ସାଢେ ଗୋଟିଏ ବେଳର । ସିସିଟିଭି ଫୁଟେଜରେ ଦେଖାଯାଇଛି, ମହିଳା ଜଣକ ସେହି ଅଳିଆ ଗଦା ନିକଟରେ ଛିଡା ହୋଇ ଏକ ବୁଲା କୁକୁରକୁ ଆଉଁସି ଦେଉଛନ୍ତି । ଏତିକି ବେଳେ ଜଣେ ଯୁବକ ଛପି ଛପି ଆସୁଛି ଏବଂ ଅତର୍କିତ ଭାବେ ମହିଳାଙ୍କୁ ଏକ ଖଣ୍ଡା ଭଳି ଅସ୍ତ୍ରରେ ଚୋଟ ପରେ ଚୋଟ ପକାଉଛି ।  

ଏଥିରେ ମହିଳାଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । ତେବେ ମୃତକ ଜଣେ ମାନସିକ ବିକାରଗ୍ରସ୍ତ ବୋଲି ଅନୁମାନ କରାଯାଉଛି । ଏ ଯାଏଁ ତାଙ୍କର ପରିଚୟ ଜଣାପଡିନି । ଗତକାଲି ସକାଳୁ ଅଳିଆ ଗଦାରୁ ତାଙ୍କର ମୃତଦେହ ଉଦ୍ଧାର ହୋଇଥିଲା । ବାଣପୁର ତହସିଲ ରୋଡ ସାଇଟ ଗାଲୁଆ ଛକ ବାର ନିକଟରେ ଥିବା ଅଳିଆ ଆବର୍ଜନାରେ ମୃତଦେହ ପଡି ରହିଥିଲା । କିଛି ବୁଲା କୁକୁର ମୃତଦେହକୁ ଝୁଣି ଖାଉଥିଲେ । ଖବର ପାଇ ପୋଲିସ ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ  ।  

ମହିଳାଙ୍କର କିପରି ମୃତ୍ୟୁ ହେଲା ତାହା ସନ୍ଦେହ ଘେରରେ ଥିବାବେଳେ ଏବେ ସାମ୍ନାକୁ ଆସିଥିବା ସିସିଟିଭି ଫୁଟେଜରୁ ଏହା ହତ୍ୟାକାଣ୍ଡ ବୋଲି ସ୍ପଷ୍ଟ ହୋଇଯାଇଛି  । ତେବେ ହତ୍ୟା କରୁଥିବା ଯୁବକ ଜଣକ କିଏ ଓ କାହିଁକି ତାଙ୍କୁ ମାରିଲା ସେନେଇ ପୋଲିସ ତନାଘନା ଚଳାଇଛି  ।  

ଇଟିଭି ଭାରତ, ଖୋର୍ଦ୍ଧା