କାମାକ୍ଷାନଗରରେ ମହୁମାଛି ଆକ୍ରମଣ; ୨ ମୃତ, ୩ ଆହତ

ଢେଙ୍କାନାଳ: ଢେଙ୍କାନାଳ ଜିଲ୍ଲା କାମାକ୍ଷାନଗରରେ ଘଟିଯାଇଛି ଏକ ଦୁଃଖଦ ଘଟଣା । ମହୁମାଛି ଆକ୍ରମଣରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ୩ ଜଣ ଆହତ ହୋଇଛନ୍ତି । ମୃତକ ମାନେ ହେଲେ କାମାକ୍ଷାନଗର ଥାନା କାଦୁଆ ଗ୍ରାମର ଝୁମର ସେଠୀ ଓ ମାୟାଧର ଦେହୁରୀ । ସେହିପରି ଅନ୍ୟ ତିନିଜଣ ଆହତ କାମାକ୍ଷାନଗର ମେଡିକାଲରେ ଚିକିତ୍ସିତ ହୋଇ ଘରକୁ ଫେରିଛନ୍ତି l ସୂଚନା ଅନୁସାରେ ଗତକାଲି ପଞ୍ଚାୟତ କାର୍ଯ୍ୟାଳୟ ନିକଟକୁ କୌଣସି କାମରେ ଯାଇଥିବା  ବେଳେ ମହୁମାଛି ଆକ୍ରମଣ କରିଥିଲା । ତେବେ ପଞ୍ଚାୟତ କାର୍ଯ୍ୟାଳୟ ନିକଟରେ ଥିବା ପାଣିଟାଙ୍କିରେ ବହୁତ ଗୁଡିଏ ବଡ ବଡ ମହୁମାଛି ବସା ହୋଇଥିଲା l ଉକ୍ତ ଦୁଇ ଜଣ ମୃତକ କୌଣସି କାମରେ ପାଣିଟାଙ୍କି ପାଖକୁ ଯାଇଥିବାରୁ ପାଣିଟାଙ୍କିରେ ଥିବା ମହୁମାଛି ବସାରୁ ଶହ ଶହ ମହୁମାଛି ମାନେ ସେମାନଙ୍କୁ ଆକ୍ରମଣ କରିଥିଲେ  l 

ଏହା ମଧ୍ୟ ପଢନ୍ତୁ .... ମହୁମାଛି ଆତଙ୍କ, ଆକ୍ରମଣରେ ୩ ଯାତ୍ରୀ ଗୁରୁତର

ଏହାପରେ ସେମାନଙ୍କୁ ତୁରନ୍ତ କାମାକ୍ଷାନଗର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ମାୟାଧରଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଜିଲ୍ଲା ମୁଖ୍ୟଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ଅନ୍ୟ ସମସ୍ତେ ଚିକିତ୍ସା ପରେ ଘରକୁ ଫେରିଥିଲେ । କିନ୍ତୁ କିଛି ଘଣ୍ଟାପରେ ଝୁମରଙ୍କ ମୃତ୍ୟୁ ହୋଇଥିବାବେଳେ ଜିଲ୍ଲା ମୁଖ୍ୟ ଚିକିତ୍ସାଳୟରେ ମାୟାଧରଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । ତେଣୁ  ମୃତକଙ୍କ ପରିବାରକୁ ଉଚିତ କ୍ଷତିପୂରଣ ସହ ଏଠାରୁ ମହୁମାଛି ଘଉଡ଼ାଇବାକୁ ଗ୍ରାମବାସୀ ମାନେ ଦାବି କରିଛନ୍ତି । ଏହି ଦୁଃଖଦ ଘଟଣା ପରେ ଗ୍ରାମରେ ଶୋକର ଛାୟା ଖେଳିଯାଇଛି l

ଇଟିଭି ଭାରତ, ଢେଙ୍କାନାଳ