5 ଘଣ୍ଟାର ଅପରେସନ୍ ପରେ ମୁକୁଳିଲା ହାତୀ, ଆମ୍ବ ଖାଇବାକୁ ଆସି ଗଛରେ ଫସିଥିଲା

ଅନୁଗୋଳ: ଦୀର୍ଘ ୧୮ ଘଣ୍ଟା ଧରି ଫସିବା ପରେ ମୁକୁଳିଲା ହାତୀ ।  ଆମ୍ବ ଖାଇବାକୁ ଆସି ଅନୁଗୋଳ ବନାଞ୍ଚଳ ବୃତ୍ତି ଗାଁ ଆମ୍ବ ତୋଟାରେ ଫସିଥିଲା ହାତୀ ।  ଯାହାକୁ ଉଦ୍ଧାର କରିବାରେ ସମର୍ଥ ହୋଇଛି ବନ ବିଭାଗ। ଅନୁଗୋଳ ବନାଞ୍ଚଳର ବୃତ୍ତି ଗାଁ ନିକଟ ଏକ ଜଙ୍ଗଲରେ ଆମ୍ବ ଖାଇବାକୁ ଆସି ମାଈହାତୀଟି ଦୀର୍ଘ ସମୟ ଗଛ ଭିତରେ ଫସି ରହି ଚିତ୍କାର କରୁଥିଲା । ବନ ବିଭାଗର ଦୀର୍ଘ ୫ଘଣ୍ଟାର ଅପରେସନ ପରେ ହାତୀଟି ସେଠାରୁ ଉଦ୍ଧାର ହୋଇପାରିଛି । ହାତୀ ଏବେ ନିକଟସ୍ଥ ଜଙ୍ଗଲକୁ ଚାଲିଯାଇଛି ।  

ଗତକାଲି ରାତିରେ ହାତୀଟି ଆମ୍ବ ଖାଇବାକୁ ଗାଁ ନିକଟ ଜଙ୍ଗଲକୁ ଆସିଥିଲା । ଶୁଣ୍ଢ ବଢ଼ାଇ ଆମ୍ବ ଖାଉଥିବା ବେଳେ ଗଛର ଦୁଇଟି ମୋଟା ଡାଳ ଭିତରେ ତା ଆଗ ଗୋଡ଼ ଫସି ଯାଇଥିଲା। ଫଳରେ ହାତୀଟି ସେଠାରୁ ଯାଇନପାରି ତଳେ ପଡି ଯାଇଥିଲା ।  ଯନ୍ତ୍ରଣାରେ ଚିତ୍କାର କରୁଥିଲା ।  ସ୍ଥାନୀୟ ଲୋକେ ଏହା ଦେଖି ବନ ବିଭାଗକୁ ଖବର ଦେଇଥିଲେ। ଫଳରେ ଆଜି ସକାଳେ ସହକାରୀ ବନ ସଂରକ୍ଷକଙ୍କ ତତ୍ତ୍ବାବଧାନରେ ଏକ ଟିମ ଘଟଣାସ୍ଥଳକୁ ଯାଇ ହାତୀ ଉଦ୍ଧାର କାମରେ ଲାଗି ପଡ଼ିଥିଲେ।  

ତେବେ ଜେସିବି ସହାୟତାରେ ଗଛ ଡାଳକୁ ଭାଙ୍ଗିବା ପରେ ହାତୀର ଗୋଡ଼ ବାହାରିଥିଲା ।  କିନ୍ତୁ ହାତୀଟି ସେଠାରୁ ଉଠି କୁଆଡେ ଯାଇ ପାରିନଥିଲା ।  ଏହାପରେ ଡାକ୍ତର ଚିକିତ୍ସା କରିବା ପରେ କିଛି ସମୟ ପରେ ହାତୀ ସେଠାରୁ ଉଠି ଜଙ୍ଗଲକୁ ଯାଇଛି । ବର୍ତ୍ତମାନ ହାତୀଟି ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡ଼ିଛି । ବନ ବିଭାଗର ଏକ ଟିମ ହାତୀର ଗତିବିଧି ଉପରେ ନଜର ରଖିଛନ୍ତି ।

ଇଟିଭି ଭାରତ, ଅନୁଗୋଳ