ସହକର୍ମୀ ଶିକ୍ଷକଙ୍କୁ ଗୋଡାଇ ଗୋଡାଇ ଚପଲରେ ପିଟିଲେ ଶିକ୍ଷୟିତ୍ରୀ, ଭିଡିଓ ଭାଇରାଲ

ଲକ୍ଷ୍ନୌ: ପରୀକ୍ଷା ପରିଚାଳନାରେ ଡ୍ୟୁଟିକୁ ନେଇ କଲେଜରେ ତାଣ୍ଡବ । ସାଙ୍ଗରେ ସ୍ବାମୀଙ୍କୁ ଧରି ସ୍କୁଲରେ ପହଞ୍ଚିଲେ ଅସନ୍ତୁଷ୍ଟ ଶିକ୍ଷୟିତ୍ରୀ । ଉତ୍ତେଜିତ ହୋଇ ହିତାହିତ ଜ୍ଞାନ ଭୁଲିଲେ । କଲେଜ ପରିସରରେ ନିଜ ସହକର୍ମୀ ଶିକ୍ଷକଙ୍କୁ ଚପଲରେ ଗୋଡେଇ ଗୋଡେଇ ମାଡ ମାରିଲେ । ବେଶ କିଛି ସମୟ ଧରି କଲେଜ ପରିସରରେ ଚାଲିଲା ଏପରି ହଙ୍ଗାମା । ଉତ୍ୟକ୍ତ ଶିକ୍ଷୟିତ୍ରୀଙ୍କୁ କାବୁ କରିବା କଲେଜର ଅନ୍ୟ ଶିକ୍ଷକ ଓ କର୍ମଚାରୀଙ୍କୁ ମଧ୍ୟ ବେଶ କସରତ କରିବାକୁ ପଡିଲା । ଏପରି ଅଭାବନୀୟ ଘଟଣା ଉତ୍ତର ପ୍ରଦେଶ ଆଗ୍ରାର ତାଜନଗରୀ ମ୍ୟୁନିସିପାଲିଟି କର୍ପୋରେସନ ଇଣ୍ଟର କଲେଜରେ ଦେଖିବାକୁ ମିଳିଛି । DLED ପରୀକ୍ଷା ଡ୍ୟୁଟିକୁ ନେଇ ଏପରି ତୁମୁଳକାଣ୍ଡ ଘଟିଥିବା କୁହାଯାଉଛି । ଉଭୟ ପକ୍ଷ ଏବେ ପୋଲିସରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି । ଶିକ୍ଷୟିତ୍ରୀଙ୍କ ଏପରି ଉନ୍ମୋତକାଣ୍ଡର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ଉତ୍ତର ପ୍ରଦେଶ ଶିକ୍ଷା ବିଭାଗ କହିଛି ।