ଚଳନ୍ତା ସ୍କୁଟରରେ ଲାଗିଲା ନିଆଁ, ଅଳ୍ପକେ ବର୍ତ୍ତିଗଲେ ଯୁବକ

କେନ୍ଦ୍ରାପଡା: ଚଳନ୍ତା ସ୍କୁଟିରେ ଲାଗିଲା ନିଆଁ । ମଝି ରାସ୍ତାରେ ହୁତୁହୁତୁ ହୋଇ ଜଳିଗଲା ସ୍କୁଟି । ଅଳ୍ପକେ ବର୍ତ୍ତିଗଲେ ସ୍କୁଟି ଚାଳକ । ଏଭଳି ଘଟଣା ଘଟିଛି ପଟ୍ଟାମୁଣ୍ଡାଇ ଥାନା ଅନ୍ତର୍ଗତ କଷଣଅଣ୍ଟା ସ'ମିଲ ଠାରେ । ଚାଳକ ଜଣଙ୍କ ହେଉଛନ୍ତି କାଟଣା ଗ୍ରାମର ପ୍ରଦୀପ୍ତ ବେହେରା । ଶୁକ୍ରବାର ମଧ୍ୟାହ୍ନ ସମୟରେ ସେ ସ୍କୁଟି ଧରି ପଟ୍ଟାମୁଣ୍ଡାଇ ଅଭିମୁଖେ ଯାଉଥିଲେ । ଏହି ସମୟରେ କଷଣଅଣ୍ଟା ସ୍ଥିତ ସ'ମିଲ ନିକଟ ମଝି ରାସ୍ତାରେ ହଠାତ ସ୍କୁଟିର ଷ୍ଟାର୍ଟ ବନ୍ଦ ହୋଇ ଯାଇଥିଲା । ଚାଳକ ଜଣଙ୍କ ସ୍କୁଟି ଷ୍ଟାଣ୍ଡ୍‌ ମାରିବା ପୂର୍ବରୁ ଗାଡି ସହ ସଂଯୁକ୍ତ ଓୟାରିଂ ଜଳି ଧୂଆଁ ବାହାରିଥିଲା। ଫଳରେ ଚାଳକ ଜଣଙ୍କ ଗାଡି ଠାରୁ ଦୁରେଇ ଯାଇଥିଲେ । ପରେ ସ୍କୁଟି ଗାଡିଟି ହୁ ହୁ ହୋଇ ଜଳି ଯାଇଥିଲା । ନିଆଁକୁ ଆୟତ କରିବାରେ ବିଫଳ ହୋଇଥିଲେ ସ୍ଥାନୀୟ ଲୋକେ । ଖବର ପାଇ ପଟ୍ଟାମୁଣ୍ଡାଇ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚିବା ବେଳକୁ ଗାଡିଟି ସମ୍ପୂର୍ଣ ଜଳି ନଷ୍ଟ ହୋଇ ଯାଇଥିଲା । ଚାଳକ ଜଣକ ସୁରକ୍ଷିତ ଥିବା ଜଣାପଡିଛି । 
 

ଇଟିଭି ଭାରତ, କେନ୍ଦ୍ରାପଡା