ରାସ୍ତାରେ ଆତଙ୍କ ଖେଳାଇଲେ ଷଣ୍ଢ, ଆହତ ହେଲେ ସ୍କୁଲ ଛାତ୍ରଛାତ୍ରୀ

ଗାନ୍ଧୀନଗର: ରାସ୍ତା ପାଲଟିଛି ଗୋଚର ଭୂମି । ବୁଲା ଗାଈ, ବଳଦଙ୍କ କବଜାରେ ରହିଛି ସହରର ରାଜରାସ୍ତା । ଯାହାଫଳରେ ଛୋଟବଡ଼ ଦୁର୍ଘଟଣାର ସମ୍ମୁଖୀନ ହେବାକୁ ପଡୁଛି । ଷଣ୍ଢ ଲଢେଇ ବେଳେ ସ୍କୁଲର ଛାତ୍ରଛାତ୍ରୀ ଆହତ ହୋଇଛନ୍ତି । ଗୁଜୁରାଟ ରାଜକୋଟର ଜେତପୁରରେ ଏଭଳି ଦୃଶ୍ୟ ଦେଖିବାକୁ ମିଳିଛି । କିଛି ସ୍କୁଲ ପିଲାଙ୍କୁ ନେଇ ଅଟୋ ଯାଉଥିବା ସମୟରେ ଦୁଇ ଷଣ୍ଢ ମଧ୍ୟରେ ଲଢ଼େଇ ହୋଇଥିଲା । ଷଣ୍ଢଟି ଅଟୋକୁ ଧକ୍କା ଦେବା ଯୋଗୁଁ ଗାଡ଼ି ଓଲଟି ପଡ଼ିଥିଲା । ଫଳରେ ସେଥିରେ ଥିବା ଛାତ୍ରଛାତ୍ରୀ ଆହତ ହୋଇଛନ୍ତି । ଘଟଣାସ୍ଥଳରେ ସ୍ଥାନୀୟ ଲୋକ ଉଦ୍ଧାର କରି ଡାକ୍ତରଖାନାରେ ଚିକିତ୍ସା କରାଇଥିଲେ । ତେବେ ଏହା ପ୍ରଥମ ଘଟଣା ନୁହେଁ । ଏହା ପୂର୍ବରୁ ରାଜକୋଟରେ ଷଣ୍ଢ ଆକ୍ରମଣରେ ଜଣେ ବୃଦ୍ଧଙ୍କ ମୃତ୍ୟୁ ହୋଇଥିଲା ।