ପ୍ରଫେଟ ମହମ୍ମଦଙ୍କ ଜୟନ୍ତୀ, ଭାଇଚାରାର ସନ୍ଦେଶ ବାଣ୍ଟିଲା ମୁସଲିମ କମିଟି

ଯାଜପୁର: ପ୍ରଫେଟ ମହମ୍ମଦଙ୍କ ଜୟନ୍ତୀକୁ ନେଇ ଚଳଚଞ୍ଚଳ ଯାଜପୁର ସହର । ଫେଟ ମହମ୍ମଦଙ୍କ ଜୟନ୍ତୀ ସାରା ରାଜ୍ୟରେ ମୁସଲିମ ସମ୍ପ୍ରଦାୟର ବ୍ୟକ୍ତି ବିଶେଷ ଅତି ଧୁମଧାମର ସହିତ ପାଳୁଥିବା ଦେଖିବାକୁ ମିଳୁଛି । ଏହି ପରିପ୍ରେକ୍ଷିରେ ବ୍ୟାସନଗର ମୁସଲିମ କମିଟି ପକ୍ଷରୁ ପ୍ରଫେଟ ମହମ୍ମଦଙ୍କ ଜୟନ୍ତୀ ଉପଲକ୍ଷେ ତାରିଣୀ ମାର୍କେଟରୁ ଶୋଭାଯାତ୍ରା ବାହାରିଥିଲା । ତାରିଣୀ ମାର୍କେଟ ସ୍ଥିତ ମସଜିଦରେ ସାମୂହିକ ନମାଜ ପାଠ କରିଥିଲେ ମୁସଲିମ ସମ୍ପ୍ରଦାୟର ବ୍ୟକ୍ତିମାନେ । ଏହାପରେ ସହରକୁ ଏକ ଭାଇଚାରାର ସନ୍ଦେଶ ଦେବା ଉଦ୍ଦେଶ୍ୟରେ ଏକ ବିରାଟ ଶୋଭାଯାତ୍ରାରେ ତାରିଣୀ ମାର୍କେଟ ଠାରୁ ବାହାରି ସମଗ୍ର ସହର ପରିକ୍ରମା କରିଛନ୍ତି l ଏହି କାର୍ଯ୍ୟକ୍ରମ ସମୟରେ ଶାନ୍ତିଶୃଙ୍ଖଳା ରକ୍ଷା କରିବା ପାଇଁ ଯାଜପୁର ରୋଡ ପୋଲିସ ପକ୍ଷରୁ ବ୍ୟାପକ ପୋଲିସ ମୁତୟନ କରାଯାଇଥିବା ଦେଖିବାକୁ ମିଳିଛି । ସେହିପରି ଆଜି ଯାଜପୁର ଜିଲ୍ଲାର ବ୍ରହ୍ମପରଦା, ବିଞ୍ଝାରପୁର, ଧର୍ମଶାଳା, କୋରେଇ, ଯାଜପୁର ଟାଉନ, ବରୀ ଓ ବଡ଼ଚଣା ଅଞ୍ଚଳର ମୁସଲିମ ସମ୍ପ୍ରଦାୟର ବ୍ୟକ୍ତି ବିଶେଷମାନେ ପ୍ରଫେଟ ମହମ୍ମଦଙ୍କ ଜୟନ୍ତୀ ଉତ୍ସବ ଧୂମଧାମର ସହିତ ପାଳନ କରିଥିବା ଦେଖିବାକୁ ମିଳିଛି ।

ଇଟିଭି ଭାରତ, ଯାଜପୁର