ନବରଙ୍ଗପୁର ପୋଲିସକୁ ସଫଳତା, ଚୋର ସହ ଚୋରୀ ସାମଗ୍ରୀ ଜବତ

ନବରଙ୍ଗପୁର: ନବରଙ୍ଗପୁର ପୋଲିସକୁ ସଫଳତା । ଟଙ୍କା, ସୁନା ଅଳଙ୍କାର ଓ LED TV ସହ ଜଣକୁ ଗିରଫ କରିବାରେ ସଫଳ ହୋଇଛି ପୋଲିସ । ଘଟଣା ଅନୁସାରେ ୯ ତାରିଖରେ ନବରଙ୍ଗପୁର କେଉଟ ସାହିର M ଭାରତୀଙ୍କ ଘରେ ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା । ଏହି ଘଟଣାରେ ନବରଙ୍ଗପୁର ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶନାରେ ପୋଲିସ ପକ୍ଷରୁ SDPO ନିହାର ରଞ୍ଜନ ପ୍ରଧାନଙ୍କ ତତ୍ତ୍ବାବଧାନରେ ପୋଲିସ ସବ୍ ଇନ୍ସପେକ୍ଟର ସବିର ଅହମ୍ମଦ, ଦେବାଶିଷ ସାହୁ ଓ ତୁଳାରାମ ପୂଜାରୀଙ୍କୁ ନେଇ ଏକ ଟିମ୍ ଗଠନ କରାଯାଇଥିଲା । ଏହି ଚୋରି ସନ୍ଦେହରେ ପୋଲିସ ବି ତିରୁପତି ରାଓକୁ ଆଟକ ରଖି ପଚରା ଉଚରା କରିଥିଲା । ପରବର୍ତ୍ତୀ ସମୟରେ ତିରୁପତି ବିଭିନ୍ନ ଚୋରିରେ ସମ୍ପୃକ୍ତ ଥିବା ସ୍ବୀକାର କରିଥିଲା । ତିରୁପତି ଠାରୁ ଦୁଇଟି ସୁନାହାର, ମଙ୍ଗଳସୂତ୍ର, ଦୁଇ ଗୋଟି LED TV, ୧୪ ହଜାର ନଗଦ ଟଙ୍କା, ଦୁଇ ଗୋଟି ମୋବାଇଲ ଫୋନ, ସୁନା ଓ ରୂପାର ଅଳଙ୍କାର ଓ ସାମଗ୍ରୀ ଜବତ କରିଛି । ତିରୁପତି ନବରଙ୍ଗପୁର ସହରରେ ଗୋଟିଏ ଗ୍ୟାରେଜ୍ କରିଥିବା ବେଳେ ଆନ୍ଧ୍ର ପ୍ରଦେଶର ସାଲୁରର ବାଙ୍ଗାରମ୍ ପେଟାର ବୋଲି ପୋଲିସ ସୂଚନା ଦେଇଛି । ଚୋରି ସାମଗ୍ରୀ ଜବତ କରିବା ସହ ତିରୁପତିକୁ ଗିରଫ କରି କୋର୍ଟ ଚାଲାଣ କରାଯାଇଛି ବୋଲି କହିଛନ୍ତି ନବରଙ୍ଗପୁର ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ।
 

ଇଟିଭି ଭାରତ, ନବରଙ୍ଗପୁର