Kukur Tihar Day Of Dog: ସେନା କୁକୁରଙ୍କୁ ସମ୍ମାନ ଜଣାଇଲା ନେପାଳ ପୋଲିସ, ପାଳିଲା କୁକୁର ତିହାର

କାଠମାଣ୍ଡୁ: ପ୍ରତିବର୍ଷ ପରି ଚଳିତ ବର୍ଷ ଅକ୍ଟୋବର ୨୪ରେ 'କୁକୁର ତିହାର' (Kukur Tihar) ପାଳିଲା ନେପାଳ ପୋଲିସ । ଦେଶ ସେବାରେ ନିୟୋଜିତ କୁକୁରକୁ ଏହି ଉତ୍ସବରେ ନେପାଳ ପୋଲିସ ଦ୍ବାରା ସମ୍ମାନିତ କରାଯାଏ । ନେପାଳ କୁକୁର ତିହାରକୁ ୫ଦିନ ଧରି ପାଳୁଥିବା ବେଳେ ପର୍ବର ଦ୍ବିତୀୟ ଦିନରେ "କୁକୁର ଦିବସ" (Day of Dog) ପାଳନ କରିଥାଏ । ନେପାଳ ପୋଲିସର କ୍ୟାନିନ ବିଭାଗ (Canine division)ପ୍ରତିବର୍ଷ କୁକୁରମାନଙ୍କୁ ସେମାନଙ୍କର ସେବା ତଥା ଅବଦାନ ପାଇଁ ସମ୍ମାନିତ କରି ଏହି ଉତ୍ସବ ଆୟୋଜନ କରିଆସୁଛି । ଡିଭିଜନରେ ଥିବା କୁକୁର ମାନଙ୍କୁ ତାଲିମ ଦିଆଯିବା ସହିତ ସର୍ବଶ୍ରେଷ୍ଠ ପ୍ରଦର୍ଶନ କରୁଥିବା କୁକୁରୁ 'ଡଗ୍‌ ଅଫ୍‌ ଦି ଇଅର' ଆଖ୍ୟା ମଧ୍ୟ ଦିଆଯାଏ । ଯେଉଁ କୁକୁର ଗୁଡିକ ଅପରାଧିକ ରହସ୍ୟର ସମାଧାନ, ପ୍ରମାଣ ସଂଗ୍ରହ, ସନ୍ଧାନ ଏବଂ ଉଦ୍ଧାର କାର୍ଯ୍ୟରେ ସାହାଯ୍ୟ କରିବା ଏବଂ ନିଶା ବ୍ୟବସାୟୀମାନଙ୍କୁ ଧରିବା ଭଳି ଗୁରୁତ୍ବପୂର୍ଣ୍ଣ କ୍ଷେତ୍ରରେ ଶ୍ରେଷ୍ଠ ପ୍ରଦର୍ଶନ କରନ୍ତି ସେମାନଙ୍କୁ ପଦକରେ ମଧ୍ୟ ସମ୍ମାନିତ କରାଯାଏ ।