Watch Video: ଏକା ସହ 25ରୁ ଊର୍ଦ୍ଧ୍ବ ନାଗ ସାପ ଛୁଆ ଉଦ୍ଧାର

ବାଙ୍ଗଲୋର: ଘର ପଛ ପଟୁ ଉଦ୍ଧାର ହୋଇଛି 25ରୁ ଊର୍ଦ୍ଧ୍ବ ନାଗ ସାପ ଛୁଆ । ଏଭଳି ଘଟଣା ହେଉଛି କର୍ଣ୍ଣାଟକରେ ଥିବା ଧରୱାଡ ଅଞ୍ଚଳର । ସୂଚନା ଅନୁସାରେ ଗତ କିଛି ଦିନ ହେବ ଘରର ଆଖପାଖରେ ଏକ ନାଗ ସାପ ବୁଲୁଥିବା ଦେଖିବାକୁ ପାଇଥିଲେ ଘର ମାଲିକ। ଫଳରେ ଘର ମାଲିକ ଜଣକ ସେହି ସାପକୁ ଉଦ୍ଧାର କରିବା ପାଇଁ ସ୍ନେକ ହେଲ୍ପ ଲାଇନକୁ ଖବର ଦେଇଥିଲେ । ଖବର ପାଇ ଶୁକ୍ରବାର ସ୍ନେକ ହେଲ୍ପ ଲାଇନ ଟିମ୍ ହିରେହାରାକୁଣି ଗାଁରେ ପହଞ୍ଚି ନାଗ ସାପକୁ ଉଦ୍ଧାର କରିବା ପରେ ପ୍ରାୟ 25ରୁ ଊର୍ଦ୍ଧ୍ବ ସାପ ଶାବକ ମଧ୍ୟ ଠାବ କରିଛନ୍ତି ।

ସେହି ସ୍ଥାନରେ ସାପର ଗତିବିଧିକୁ ନେଇ ପୂର୍ବରୁ ପଡୋଶୀମାନେ ଭୟଭୀତ ଅବସ୍ଥାରେ ରହିଥିଲେ । ତେବେ ଏକା ସାଙ୍ଗରେ ନାଗ ସାପର ଏତେ ଛୁଆ ଦେଖିବା ପରେ ଅଞ୍ଚଳବାସୀ ଆଶ୍ଚର୍ଯ୍ୟ ହୋଇଯାଇଛନ୍ତି । ଏହାସହ ଲୋକମାନେ ଘଟଣାସ୍ଥଳରେ ଜମା ହୋଇ ସାପ ଗୁଡିକର ଫଟୋ ଓ ଭିଡିଓ ମୋବାଇଲରେ କଏଦ କରିଥିବା ଦେଖିବାକୁ ମିଳିଛି । ତେବେ ସମସ୍ତ ଶାବକକୁ ଉଦ୍ଧାର କରି ନେଇଛନ୍ତି ରେସ୍କ୍ୟୁ ଟିମ୍।